Silfruð syrpa á Borginni

Söngvarinn Seth Sharp flytur silfraða söngdagskrá ásamt söngkonunni Vé­dísi Hervöru Árnadóttur á Borginni í kvöld og annað kvöld.

Tónleikarnir fara fram á veitingastaðnum Silfur á Hótel Borg sem er skemmtileg tilviljun því Seth fékk hugmyndina að baki dagskránni og yfirskrift hennar löngu áður en staðsetningin var ákveðin. „Þetta var algjör tilviljun, ég kalla dagskrána „Silfur“ sem vísar til blöndu af svörtu og hvítu. Við flytjum íslensk og bandarísk lög og blöndum þeim saman í syrpu, til dæmis flytur Védís lagið „Sofðu unga ástin mín“ og ég syng „Summertime,“ útskýrir Seth Sharp.

Hann kveðst hafa tekið eftir ýmsum hliðstæðum í menningu Íslendinga og Bandaríkjamanna, einkum blökkumanna, og vísar þar til harðneskjunnar sem Íslendingar bjuggu við, til dæmis fyrir stríð. „Það eru mörg þemu í íslenskri tónlist frá þeim tíma sem hafa líkindi við tónlist blökkumanna og mér fannst fróðlegt að kanna það nánar. Síðan fékk ég styrk frá bandaríska sendiráðinu til þess að halda þessa tónleika.“ Í kvöld og á morgun gefst hlustendum síðan kostur á að heyra afraksturinn en aðeins tvennir tónleikar eru fyrirhugaðir því söngkonan er á leið aftur til London, þar sem hún dvelur um þessar mundir.

Seth útskýrir að þau muni segja ákveðna sögu í gegnum tónlistina en áréttar að sú saga sé alls ekki sorgleg. „Það eru sorgleg andartök en það fallega við menningu beggja landa er þessi óbilandi sjálfsbjargarhvöt. Íslendingar eru þjóð sem lifir af. Þið setjið upp skemmtigarð í þessum napra kulda. Það minnir mig á heimabæ minn, Hartford í Connecticut, en í hverfinu mínu bjuggu aðeins blökkumenn. Þar bjargaði fólk sér og byggði án þess að velta því of mikið fyrir sér. Ef það vantaði körfuboltavöll þá festu menn gjörð upp í tré og þá var kominn völlur.“

Seth Sharp og Védís vinna saman í fyrsta skipti en hann segist gjörsamlega heillaður af söng hennar. „Ég var að leita að einhverjum til þess að flytja þetta efni með mér og nokkrir mæltu með henni við mig. Síðan sungum við saman á veitingastaðnum Horninu þar sem ég kem fram með djassdagskrá annan hvern fimmtudag og það gekk frábærlega. Það er sérstakt og sjaldgæft að fá að syngja svona tónlist með svona söngkonu, hún er með undursamlega rödd.“

Tónleikarnir hefjast kl. 21.00 í kvöld og annað kvöld.