Ryksuguframleiðandi þjarmar að NilFisk

Danski ryksuguframleiðandinn Nilfisk Advance og rokkhljómsveitin NilFisk frá Stokkseyri eru nú komin í hár saman vegna deilna um nafnið. Hljómsveitin NilFisk hefur hingað til verið í góðu samstarfi við umboðsaðila Nilfisk Advance hér á landi og segja báðir aðilar að nöfnin valdi engum misskilningi eða skaða. Hljómsveitin hélt tónleika í Kaupmannahöfn fyrir skemmstu og í góðri trú ákváðu meðlimir hljómsveitarinnar að senda samnefndu fyrirtæki eintak af plötu sinni.

Í kjölfarið barst hljómsveitarmeðlimum bréf frá lögfræðingi fyrirtækisins sem var alls ekki hrifin af því að hljómsveitin skyldi nota þetta nafn. Lögfræðingurinn fór fram á að geisladiskar og aðir munir merktir hljómsveitinni yrðu gerðir upptækir, auk þess sem hann fór fram á greinargóðar upplýsingar um sölutölur, tónleikahald og meðlimi hljómsveitarinnar. Strákarnir í NilFisk fengu Ólaf Helga Kjartansson, sýslumann á Selfossi, til liðs við sig og svöruðu fyrirtækinu bréflega og bíða nú eftir viðbrögðum.

Sveinn, trommuleikari NilFisk, segir viðbrögð fyrirtækisins hafa komið hljómsveitinni í opna skjöldu. Það getur allt gerst í þessu máli og við vitum ekkert ennþá. Við munum þó gera okkar besta til þess að halda nafninu, segir hann. Hljómsveitarmenn eru þó ekki farnir að huga að því hvað þeir muni gera ef þeir neyðast til þess að skipta um nafn. Við erum ekkert farnir að spá í annað nafn, segir Sveinn.