Tímaþjófur á Ölstofunni

Gestum á Ölstofu Kormáks og Skjaldar varð bylt við á dögunum þegar klukku staðarins var stolið. Veitingamennirnir Kormákur Geirharðsson og Skjöldur Sigurjónsson eiga hins vegar hauk í horni þar sem ítalski barþjónninn Fabio la Marca er, því hann gerði sér lítið fyrir og hafði upp á þjófnum og endurheimti klukkuna.

Uppi varð fótur og fit aðfaranótt laugardags þegar gestir á Ölstofunni tóku eftir því að klukka staðarins var horfin af veggnum sem hún hangir venjulega á. Eftir að hafa leitað klukkunnar dyrum og dyngjum lék ekki vafi á að henni hafði verið stolið en þegar barþjónar staðarins voru orðnir úrkula vonar um að sjá gripinn nokkurn tímann aftur hljóp hins vegar á snærið hjá þeim.

"Ég var í pásu og brá mér aðeins út fyrir til að fá mér ferskt loft," segir Fabio la Marca, barþjónn á Ölstofunni. "Þá tók ég eftir ungum manni þarna fyrir utan en hann hafði verið inni fyrr um kvöldið. Ég sá að hann var að reyna að fela eitthvað innan undir jakkanum sínum og þegar betur var að gáð sást að þetta var klukkan."

Þegar Fabio kallaði til mannsins og bað hann um að skila klukkunni tók tímaþjófurinn til fótanna. Fabio beið þá ekki boðanna heldur stökk á eftir honum og hljóp þjófinn uppi á örskotstundu. "Ég greip í hann og bað hann um að skila mér klukkunni sem og hann gerði mótþróalaust. Ég spurði hann hvað hann væri eiginlega að spá í að stela klukku og hann svaraði að sig hefði bara langað í hana. Hann var greinilega vel við skál," segir Fabio, sem minnnist þess ekki að hafa séð þennan bí­ræfna gest á Ölstofunni áður.

Rummungurinn slapp þó með skrekkinn í þetta sinn því Fabio, sem fastagestir Ölstofunnar lýsa sem manni sátta, ákvað að kæra þjófnaðinn ekki til lögreglunnar. "Mér fannst nóg að fá klukkuna aftur. Þetta var bara eitthvert fyllerísrugl og maðurinn skammaðist sín greinilega."

Fabio var tekið sem hetju þegar hann sneri aftur með klukkuna og klöppuðu gestir Ölstofunnar honum lof í lófa. Sjálfur gerir hann þó lítið úr afreki sínu. "Ég sá bara að hann var með klukkuna og ákvað að ná henni aftur. Þetta var ekkert stórmál."

Klukkan er nú komin aftur á sinn stað upp á vegg og þurfa gestir Ölstofunnar því ekki að hafa áhyggjur af því að sitja of lengi fram eftir við ölið.