Hefði viljað setja eitt mark

"Ég var mjög sáttur við leik liðsins í dag og einnig mjög sáttur við minn leik. Ég er aftur að komast í mitt besta form," sagði Eiður Smári Guðjohnsen eftir 3-1 sigur Chelsea á West Ham í ensku úrvalsdeildinni í gær.

Eiður Smári kom inn á 13. mínútu leiksins eftir að Michael Essien hafði meiðst. Hann lagði m.a. upp síðasta mark liðsins sem Didier Drogba skoraði en þetta var fjórði sigurleikur Chelsea í röð yfir hátíðirnar.

"Þjálfarinn var mjög ánægður með mig í þessum leik og það er alltaf gaman þegar vel gengur. Ég hefði bara viljað setja eitt mark um jólin sem hápunkt, ef svo má segja. En á meðan við erum að fá þrjú stig í leik er ekki hægt að kvarta," sagði Eiður og bætti því við að það hefði komið honum á óvart hversu mikill kraftur hefði verið í honum þrátt fyrir hið gríðarlega álag sem er á leikmönnum deildarinnar yfir hátíðirnar.

"Þetta er náttúrlega ekki hefðbundin hátíðahöld eins og Íslendingar þekkja þau. Maður vandar sig mjög við að borða og nota allan þann tíma sem hægt er til að hvílast. Svefn er lykilatriði og ég hef vandað mig mjög yfir jólin að hvílast eins og ég hef getað."

Eftir sigur Chelsea er liðið með 14 stiga forystu á Man. Utd sem á reyndar leik til góða gegn Arsenal. Þá tapaði Liverpool loks stigum gegn Bolton í gær eftir að hafa unnið 10 leiki í röð þar á undan og er liðið nú 17 stigum á eftir Chelsea. Lokatölur urðu 2-2 og komu bæði mörk Boltonliðsins eftir varnarmistök hjá Liverpool.