Verkjameðferð að lognast út af

Þverfagleg verkjameðferð á Landspítala er að lognast út af vegna fjárskorts. Sérfræðingur í hjúkrun verkjasjúklinga telur ástandið ekki boðlegt lengur og hefur í bréfi til yfirstjórnar spítalans óskað eftir því að þjónustan verði formlega lögð af. Öll höfum við fundið fyrir verkjum, mismiklum eins og gengur, hvort sem það er tannpína eða bakverkur. Raunar er talið að þriðjungur Íslendinga á hverjum tíma þjáist af verkjum. En til er hópur fólks sem býr við stöðuga og mikla verki. Anna Gyða Gunnlaugsdóttir segir að sumir þeirra glími við mjög flókinn heilsufarsvanda, þeir séu orðnir öryrkjar og hafi dottið út af vinnumarkaði og séu félagslega einangraðir og þunglyndir. Anna Gyða er sérfræðingur í hjúkrun sjúklinga með verki. Fyrir átta árum var hún ráðin sem starfsmaður verkjateymis Landspítalans en þar starfaði saman hópur heilbrigðisstarfsmanna við að bæta þjónustu við þennan sjúklingahóp. Anna Gyða segir að oft hafi hópurinn getað veitt góða meðferð en nú sé búið að leggja þá þjónustu niður að miklu leyti, m.a. vegna þess að margir í teyminu hafi hætt störfum hjá spítalanum eða séu komnir í önnur verkefni. Hún og afgangurin af teyminu hafi sent yfirstjórn spítalans bréf þess efnis að þau vilji ekki taka þátt í að veita jafnslaka þjónustu og raunin sé nú. Fyrir tveimur árum markaði sjúkrahúsið þá stefnu að koma á fót verkjamiðstöð. Ekkert hefur orðið úr þeim áformum. Anna Gyða segir að viljinn sé fyrir hendi en það virðist ekki vera til fé til að gera vissa hluti innan spítalans. Hún telji að þjónusta við þá sem glími við langvinn vandamál sé ekki góð. Fólk sem þjáist af verkjum verði þannig út undan. Anna Gyða segir að ofuráhersla sé lögð á þjónustu við bráðveika, bæði í þjóðfélaginu og á spítalanum, og það sé fínt. Hins vegar þurfi líka að sinna þeim langveiku og henni finnist sem allir skilgreini sig frá vanda langveikra. Fyrir þetta líði hópur verkjasjúklinga úti í samfélaginu. Lífsskilyrði sumra séu ömurleg en hún sé viss um að ýmislegt sé hægt að gera til að bæta þau. Í bréfi sínu, sem stílað er á hjúkrunarforstjóra Landspítalans, segist Anna Gyða Gunnlaugsdóttir ekki geta varið ástandið lengur en minnir á að verkjastilling teljist nú orðið til mannréttinda.