Alger endurnýjun á Austurstræti 17

Miðbæjarmyndin mun taka nokkrum breytingum á næstu vikum og mánuðum með algerri endurnýjun á suðurhlið hússins við Austurstræti 17. Á allri suðurhlið hússins, sem snýr að Austurstrætinu, verður skipt um gler og glugga. Þá verður gert við steypuskemmdir og steyptir fletir hússins málaðir. Loks verður hluti hússins álklæddur. Eik fasteignarfélag hf. á húsið og stendur fyrir breytingunum.„Það er okkur sannarlega ánægjulegt að taka þátt í því að snúa við þeirri þróun sem átt hefur séð stað á undanförnum árum þar sem sífellt fleiri fyrirtæki færa sig frá miðbænum. Til þess að lífga miðborgina við þurfum við ekki hvað síst að fleiri fyrirtæki færi sig á þessar slóðir,“ segir Garðar Hannes Friðjónsson, framkvæmdastjóri Eikar, en félagið á nú húsnæði sem þekur yfir 22 þúsund fermetra í póstnúmerinu 101 Reykjavík. „Við höfum líka fundið fyrir því í okkar rekstri að það er mikil eftirspurn eftir mjög góðu atvinnuhúsnæði í miðbænum. Þrátt fyrir að mikið hefur verið um húsnæði er ekki þar með sagt að það sé um auðugan garð að gresja hvað varðar húsakostinn sem er í boði. Ein helsta ástæðan fyrir því að fyrirtæki hafa flúið miðbæinn er tiltölulega hátt leiguverð fyrir ófullkominn húsakost. Það er því hængur fyrir miðborgina að við getum boðið upp á mjög glæsilegt húsnæði í miðborginni á mjög sanngjörnum kjörum,“ segir Garðar. Samhliða andlitslyftingunni verða gerðar ýmsar breytingar á verslun 10-11 á fyrstu hæð hússins. Þeim breytingum er ætlað að koma til móts við kröfur viðskiptavina og auka úrval tilbúinna rétta, bjóða upp á nokkurs konar „miðbæjarbístró“ þar sem viðskiptavinir geta setið inni í versluninni og notið veitinga. Þann 7. mars verður hafist handa við breytingarnar og búist er við því að þeim ljúki um miðjan maí. Teiknistofa Halldórs Guðmundssonar hannaði nýtt útlit húsnæðisins og er verkefnisstjórn í þeirra höndum. Mworldwide og Arkís sjá um hönnun nýs húsnæðis fyrir 10-11.