Vöruviðskipti DAS í fortíðinni

Björn Bjarnason dómsmálaráðherra segir unnið að endurskoðun laga um happdrætti hjá dómsmálaráðuneytinu. "Ég er að láta útbúa ný happdrættislög þar sem tekið verður af skarið um þessi mál svo menn þurfi ekki að vera í vafa þegar lögin eru lesin," segir Björn. Vafinn sem um ræðir er sá að Happdrætti DAS, sem hefur lagaheimild til úthlutunar fjármuna til vörukaupa, hlutast ekki til um í hvað vinningahafar eyða þeim fjárhæðum sem þeim fellur í skaut. Happdrætti háskóla Íslands hefur hins vegar einkaleyfi til óskuldbundinna peningagreiðslna til ársins 2019. Björn segir að hann hafi ekkert við vinnuhætti Happdrættis DAS að athuga, telji menn að lög séu brotin sé unnt að leita álits dómstóla á því. Sigurður Ágúst Sigurðsson, forstjóri happdrættis DAS, segir áralanga hefð fyrir vinnuháttum happdrættisins, enda heyri vöruviðskipti sögunni til. Vinningshafar séu beðnir um greiðslukvittanir þegar fjárhæðir til kaupa á vörum að eigin vali séu reiddar fram. Ekki sé amast við því rétti vinningshafar fram eldri greiðslukvittanir en útdrátturinn segi til um, því hvergi í lögum né reglugerðum um Happdrættis DAS sé tilgreint að greiða beri vinninga út gegn reikningum sem séu eftir dráttardag í happdrættinu. Sigurður segir að geti vinningshafi ekki sýnt greiðslukvittun komi það ekki í veg fyrir að fjárhæðir falli vinningshafa í skaut. Reglurnar kveði einungis á um að Happdrætti DAS megi ekki bjóða peninga í vinning. Sigurður gagnrýnir einkaleyfi Happdrættis háskóla Íslands til fégreiðslna og segir það hvorki í takt við nútíma viðskiptahætti né samrýmast samkeppnislögum. Guðmundur Sigurðsson, forstöðumaður samkeppnissviðs hjá Samkeppnisstofnun, segir stofnunina hafa úrskurðað um ójafnræði happdrætta árið 2000. Það ójafnræði ríki enn: "Því var þá beint til ráðherra að samkeppnisstaða happdrætta yrði jöfnuð." Björn segist ekki ræða efni frumvarps sem sé í smíðum og því ekki hvort farið verði að ráðleggingum samkeppnisstofnunar.