Neville og Arteta heimskulegir

David Moyes var ekki ánægður með að þurfa að sjá á eftir tveimur leikmanna sinna af velli með rautt spjald í leiknum við Liverpool í gærkvöldi og sagði að þeir Phil Neville og Mikel Arteta hefðu verið heimskir að láta reka sig af velli með sitt annað gula spjald.

"Þeir voru báðir heimskir að láta reka sig svona útaf og ég sagði þeim það. Þeir voru báðir komnir með gult spjald og eiga að vita betur. Þeir hafa líklega viljað sýna að þeim væri ekki sama, en þó ég virði það við þá, kemur þetta niður á liðinu í næstu leikjum," sagði Moyes reiður, en lið hans er á lóðréttri niðurleið í deildinni þessa dagana og hefur tapað fjórum leikjum í röð, þremur síðustu með samanlagðri markatölu 11-1.