Helmingi betri horfur

Lyf, sem notað er í baráttunni við brjóstakrabbamein eykur batahorfur um helming ef það er gefið strax í upphafi meðferðar. Fögnuðurinn í læknastéttinni er slíkur að helsti sérfræðingurinn á Íslandi á þessu sviði man ekki eftir öðru eins. Brjóstakrabbamein er algengasta gerð krabbameins í konum og allt að 1 af hverjum 12 íslenskum konum fá brjóstakrabbamein einhverntíma á lífsleiðinni. Lyfið, sem nefnist Herceptin, gagnast um fjórðungi kvenna með sjúkdóminn. Hjá þeim hafa krabbameinsfrumurnar yfirborðsmótefni sem Herceptin vinnur á. Það ræðst á sjúkdómin en lætur flesta aðra vefi líkamans í friði og er þannig ólíkt öðrum lyfujm sem notuð eru í meðferð gegn brjóstakrabbameini. Fram að þessu hefur það eingöngu verið notað ef brjóstakrabbameinið tekur sig upp að nýju eða breiðist út. Ítarlegar rannsóknir sem gerðar voru bæði í Banaríkjunum og Evrópu, og þúsundir kvenna tóku þátt í, sýna hins vegar að það gagnast konum sem eru nýgreindar. Reyndar svo vel að lyflæknar tala um stórtíðindi þegar þær hafa verið kynntar á alþjóðlegum rástefnum. Sigurður Björnsson, yfirlæknir á lyflækningadeild krabbameina segir niðurstöðurnar hafa vakið svo mikla hrifingu að hann muni ekki eftir öðru eins. Þær konur sem hafi fengið þetta sem viðbót við nýja meðferð hafi verið helmingi líklegri en aðrar til að lifa af. Skráning lyfsins hér á landi, líkt og annars staðar, miðast hins vegar eingöngu við notkun ef krabbameinið hefur breiðst út eða tekið sig upp að nýju og því mætti ætla að þar yrði breyting á. Sigurður segir líklegt að svo verði, með tilliti til þess hve mikilvægar breytingarnar séu. Meðferðin sé dýr, en læknar láti það helst ekki hafa áhrif á sig þegar mælt sé með meðferðarúrræðum. Ársmeðferð með Herceptin kostar á bilinu 2 til 3 milljónir fyrir hvern einstakling og talið er að tveggja ára meðferð með lyfinu gagnist best, svo ljóst er að um verulegar upphæðir er að ræða. Brjóstakrabbamein er sjúkdómur sem konur fá á bestu árum ævinnar, allt niður fyrir þrítugt.