Þúsundir látin og óttast um fleiri

Þúsundir létust þegar öflugur jarðsjálfti reið yfir Pakistan, Indland, Bangladesh og Afghanistan um klukkan níu í gærmorgun að staðartíma. Upptök skjálftans voru um hundrað kílómetra norðaustan við höfuðborg Pakistans, Islamabad, í skógivöxnum fjallahlíðum Kasmír-héraðs. Skjálftarnir ýttu af stað grjótskriðum, rústuðu íbúðarhúsum og jöfnuðu heilu þorpin við jörðu. Þegar blaðið fór í prentun var ljóst að minnsta kosti 3000 hafa farist og óttast er um afdrif fjölda annarra. Eftirskjálftar gengu yfir í nokkrar klukkustundir eftir stóra skjálftann og gerðu björgunarsveitum erfitt fyrir. Á spítölum voru slasaðir fluttir út fyrir af ótta við að byggingarnar myndu hrynja ef fleiri skjálftar yrðu. Þegar tók að skyggja gerði regn og haglél björgunarstarfið enn erfiðara. Símasamband liggur víðast hvar niðri á svæðin og sprungur í brúm gera þær hættulegar yfirferðar. Í fljótu bragði virðist eyðileggingin mest í Pakistan, sérstaklega í Kasmír Þá varð mikið tjón þar sem ljóst er að hundruð manna hafa fallið og að minnsta kosti 2.700 heimili eyðilögðust bæði í pakistanska og indverska hlutanum. Nokkrir létust i Afganistan í kjölfar skjálftans en fregnir af manntjóni hafa ekki borist frá Bangladesh. Margir eftirlifendur á svæðunum sem urðu hvað verst úti hafa ekki húsaskjól. Á götuhorni í bænum Mansehra í norðurhluta Pakistan stóð kaupmaðurinn Haji Fazal Ilahi yfir líki fjórtán ára gamallar dóttur sinnar. Sjálfur var hann á heimleið í þorpið þegar skjálftinn reið yfir. „Ég sá bara grjót og hús ryðjast niður fjallshlíðarnar. Þegar ég kom í þorpið var ekkert eftir af heimili mínu," segir Ilahi sem einnig missti eiginkonu sína og bróður í jarðskjálftanum. Búist er við að það muni taka marga daga þar til heildarmynd fæst á tjónið sem varð. Sameinuðu þjóðirnar og fjöldi alþjóðlegra hjálparstofnana hafa boðið fram aðstoð sína. Þá hafa Indverjar lagt ágreining sinn við Pakistana til hliðar og rétt fram hjálparhönd.