Spunameistari í vandræðum

Fyrrverandi spunameistari danska forsætisráðherrans vill endurgreiða ráðuneytinu símreikning vegna einkasímtala sinna, sem nemur rúmum tveimur milljónum íslenskra króna. Forsætisráðuneytið telur sér ekki heimilt að taka við peningunum, og þess vegna fer danska fjármálaráðuneytið í málið í fyrramálið. Eftir fimm ár sem spunameistari danska forsætisráðherrans sagði Michael Kristiansen upp á dögunum. Forsætisráðherrann var vart búinn að gefa honum klapp á bakið fyrir góð störf þegar fjölmiðlar flettu ofan af hverju fjármálahneysklinu á fætur öðru. Leigubílakostnaður vegna einkanota, sem nam rúmum 50 þúsund íslenskum krónum, átta mánaða farsímareikningur upp á hálfa milljón íslenskar og þriggja ára reikningur fyrir heimasíma sem nam yfir tveimur milljónum íslenskra króna, voru meðal fyrstu mála. Ástæðan voru símtöl til kærustu í Tékklandi og í kjölfarið símtöl hennar heim til Tékklands eftir að hún flutti til Danmerkur og giftist spunameistaranum Michael Kristiansen. Rétt fyrir helgina kom svo í ljós að spunameistarinn hafði notað greiðslukort forsætisráðuneytisins í eigin þágu. Fyrst sagðist hann sjálfviljugur hafa látið greiðslukortin af hendi en forsætisráðherrann sagði í kjölfarið að greiðslukortin tvö hafi verið innkölluð af ráðuneytinu, annað í fyrra og hitt í vor. Anders Fogh Rasmussen og ráðuneyti hans hafa legið undir gagnrýni fyrir að hafa ekki gripið fyrr inn í, en sem dæmi var vitað um óhóflega símnotkun spunameistarana fyrir tveimur árum en ekkert gert fyrr en í upphafi þessa árs. Michael Kristiansen hefur svarað fyrir símreikningana þannig að hann hafi ekki haft hugmynd um upphæðina fyrr en fjölmiðlar fóru í málið. „Ég var á fríum síma og spáði ekkert meira í það,“ segir hann og gagnrýnir forsætisráðuneytið fyrir að láta sig ekki vita um stöðu mála. Varðandi greiðslukortin hafi hann greitt allt til baka og hið sama vilji hann nú fá að gera með símreikninginn. Forsætisráðuneytið telur sig hins vegar ekki geta tekið við greiðslu vegna heimasímans þar sem fyrirkomulagið „frír sími“ þýði að Kristiansen hafi mátt hringja ótakmarkað og hefur því verið beðið um mat fjármálaráðuneytisins á málinu. Hins vegar sá danska forsætisráðuneytið ekkert athugavert við að taka við því sem nemur hálfri milljón íslenskra króna vegna nota á farsíma ráðuneytisins á sínum tíma, en ráðuneytið hefur reyndar verið gagnrýnt fyrir að hafa um svipað leyti greitt spunameistaranum bónus, sem nam rúmum sjö hundruð þúsund íslenskum krónum.