Neyðarástand á leikskólum

Engar tölur eru til um það hjá menntasviði Reykjavíkurborgar hve mörg börn eru á biðlista eftir plássi í leikskólum borgarinnar vegna starfsmannaeklu. Að sögn Gerðar G. Óskarsdóttir, sviðsstjóra menntasviðs Reykjavíkurborgar, vantar enn um 100 starfsmenn í leikskólana og hafa leikskólastjórar í 18 leikskólum tilkynnt að þeir neyðist hugsanlega til að grípa til aðgerða vegna skorts á starfsfólki ef starfsmannamál leysast ekki á næstunni. "Leikskólastjórar segjast neyðast til að stytta dvalartíma barna og stytta skóladaginn," segir Gerður. Þá hafa myndast biðlistar vegna manneklu því sumir leikskólar geta ekki tekið inn ný börn sem sótt hafa um vist. Alls eru 132 börn á biðlista í þeim 18 leikskólum sem ástandið er verst í. Leikskólinn Geislabaugur í Grafarholti er þar á meðal. Þar eru 34 börn á biðlista og enn á eftir að ráða í sex stöður af 24, að sögn leikskólastjórans, Ingibjargar Eyfells. Guðrún María Harðardóttir, leikskólastjóri á Grandaborg, hélt fund með foreldrum og starfsmönnum leikskólans í fyrradag og var borgarstjóri, Steinunn Valdís Óskarsdóttir, viðstödd. Á Grandaborg vantar í þrjár til fjórar stöður en leikskólinn er samt sem áður fullsetinn því búið var að taka öll ný börn inn áður en starfsfólk hætti fyrirvaralaust. "Við ákváðum á fundinum að skerða vistunartíma á hvert barn um eina klukkustund," segir Guðrún María. "Það eru mildustu aðgerðirnar sem við gátum gripið til," segir hún og bendir á að aðrir leikskólar hafi jafnvel þurft að loka deildum til skiptis heilu dagana. Steinunn Valdís tilkynnti þar jafnframt að kjarasamningar starfsmanna á leikskólum og frístundaheimilum yrðu endurskoðaðir fyrr en ætlað var og að borgin geri ráð fyrir auknum kostnaði sem nemi 20 til 50 milljónum vegna aukins álags á starfsfólk vegna manneklu. Samkvæmt upplýsingum frá Íþrótta- og tómstundaráði Reykjavíkur vantar enn um 100 starfsmenn á frístundaheimili borgarinnar.