Stolt og litadýrð í gleðigöngu

Stolt, gleði, litadýrð og ótrúlegt hugmyndaflug einkenndi Gay Pride gleðigönguna í dag. Enn fjölgar þeim sem taka þátt í hátíðarhöldunum, en talið er að á milli fjörutíu og fimmtíu þúsund manns hafi lagt leið sína í miðborgina í dag. Þetta er í sjöunda sinn sem Hinsegin dagar eða Gay Pride hátíðin er haldin í Reykjavík og hún heldur áfram að stækka á alla kanta. Hápunkturinn, gleðigangan sem farin var niður Laugaveg, var með allra glæsilegasta móti og hefur aldrei verið lengri. Gay Pride skipar sér í flokk með stærstu útihátíðum Íslendinga en það er þó ekkert séríslenskt að fólk flykkist út á götu til þess að sýna samstöðu með samkynhneigðum. Árið 1970 fóru samkynhneigðir í New York og San Fransisco í fyrstu göngurnar til að minnast uppþota í Greenwich Village í New York ári áður. Þær óeirðir marka tímamót í sögu lesbía og homma um allan hinn vestræna heim því í fyrsta sinn tóku þau á móti þegar að þeim var sótt. Nýir tímar voru runnir upp. Nú eru farnar göngur í hinum ýmsu borgum heims. Þær eru ólíkar frá landi til lands en í þeim löndum sem samkynhneigðum er búið mest og best öryggi eru Gay Pride hátíðir fullar af litum, lífi og fjöri eins og í Reykjavík. Víða um heim snúast göngur samkynhneigðra hins vegar upp í átök og uppþot líkt og í Júgóslavíu þar sem lesbíum og hommum var misþyrmt af ungum hægrisinnuðum öfgamönnum þegar þau ætluðu í sína fyrstu göngu um stræti Belgrad fyrir fjórum árum. Þau sem stóðu fyrir göngunni í miðborg Reykjavíkur í dag segja að um leið og þau fagni öryggi og fengnu frelsi þá sýni þau samstöðu með systrum sínum og bræðrum í þeim löndum sem enn þá kúga, misþyrma og drepa fyrir þann glæp einn að leggja ást á eigið kyn.