Ógnað í yfirheyrslum

"Ég var óörugg um mína stöðu enda fékk ég aldrei upplýsingar um hvað gerðist næst," segir Arna Ösp Magnúsardóttir, tvítugur Palestínufari. Arna er komin til Lundúna eftir handtöku ísraelskra yfirvalda á flugvellinum í Tel Aviv í Ísrael á mánudag. Örnu var haldið af lögreglu í þrjátíu klukkustundir áður en henni var vísað úr landi. "Vegabréfið og töskurnar mínar voru teknar af mér þegar ég kom á flugvöllinn og ég færð til yfirheyrslu," segir Arna Ösp. "Þar var mér haldið í tíu klukkustundir, með einu stuttu hléi þegar ég fékk samloku að borða." Að sögn Örnu var henni gert að sök að hafa hjálpað hryðjuverkamönnum. "Mest af yfirheyrslunni snerist um að fá nöfn og upplýsingar um annað fólk, en minnst um hvað ég væri að gera eða ætlaði að gera." Arna segist hafa upplifað yfirheyrsluna sem yfirþyrmandi og ógnandi. Þá hafi henni verið hótað. "Einn þeirra sem yfirheyrðu mig sagðist hafa fengið leyfi yfirmanns síns til þess að gera við mig hvað sem hann vildi ef ég væri ekki samvinnuþýð." Arna segir bónir hennar um að fá að hafa samband við ræðismann Íslands og fjölskyldu sína ekki hafa verið virtar. "Mér var ýtt inn í klefa og það var hlegið að mér þegar ég minntist á réttindi mín," segir Arna. "Svo var öskrað að ég hefði engin réttindi og ætti ekki rétt á neinu." Ástæður handtökunnar telur Arna hafa verið starf hennar í Palestínu, en þar var hún í þrjá mánuði síðastliðið sumar og starfaði með alþjóðlegu samtökunum International Solidary Movement. "Þetta var greinilega í tengslum við að ég hef verið að vinna með Palestínumönnum," segir Arna. "Þeir vilja koma í veg fyrir að fólk fari til Palestínu og verði vitni að því sem þar er að gerast." Arna hyggst dvelja um tíma í Lundúnum og reyna að leita réttar síns. "Ég mun að minnsta kosti hafa samband við utanríkisráðuneytið og sjá síðan til."