Eðlilegur fréttaflutningur

Eiríkur Jónsson, blaðamaður Hér og nú, neitar því að nokkuð sé óeðlilegt við fréttaflutning blaðsins af fjölskyldumálum Bubba Morthens. Í fréttum Stöðvar 2 í gær sagðist Bubbi ætla að fara í mál við þá sem bæru ábyrgð á forsíðufréttum Hér og nú. Í síðustu viku var því slegið upp á forsíðu blaðsins að Brynja hefði haldið framhjá Bubba og í vikunni á undan var forsíðufyrirsögnin tvö orð: „Bubbi fallinn!“ Við nánari athugun vísaði fyrirsögnin til þess að Bubbi væri byrjaður að reykja á nýjan leik. Bubbi kallar þessa nýju blaðamennsku ofbeldi. Einn þeirra sem hann nefndi sérstaklega til sögunnar í viðtalinu í gær var Eiríkur Jónsson sem er í ritstjórn Hér og nú. Bubbi kveðst geta skorað á Mikael Torfason, ritstjóra DV, Gunnar Smára Egilsson, forstjóra 365 fjölmiðla sem gefa út Hér og nú, og Eirík, í bardaga inni í hnefaleikahring og þar myndi hann berja þá í klessu. Hann segir þetta ekkert ósvipað.  Eiríkur segir hins vegar ekkert óeðlilegt við umfjöllun blaðsins um Bubba. DV hafi stundað þetta lengi. Aftur á móti hafi aðrir fjölmiðlar ekki sinnt því hlutverki sínu að miðla upplýsingum til lesenda og hlustenda heldur skammtað upplýsingarnar. Aðspurður hvort ekki sé of langt gengið með áðurnefndum fréttum og forsíðum spyr Eiríkur á móti hvort framhjáhald sé bannorð í íslenskri tungu eða íslenskum fjölmiðlum þegar 60% allra hjónabanda endi með skilnaði. „Og í 90% tilvika hefur verið um framhjáhald að ræða býst ég við,“ segir Eiríkur. Eiríkur segist skilja að Bubbi sé sár; hann sjálfur myndi vera svekktur og sár ef hann væri Bubbi. Þetta sé hins vegar gamla sagan um að skjóta boðbera illra tíðinda. Það sé ekki Hér og nú sem standi í framhjáhaldi eða sé að skilja. Blaðið segi aðeins fréttir af atburðunum. Aðspurður segir Eiríkur konu mannsins, sem sagður er hafa átt vingott við fyrrverandi konu Bubba, standa við hvert einasta orð. Og Eiríkur tekur fram að konan sé líka stór aðili að máliu og fórnarlamb. Gunnar Smári Egilsson, framkvæmdastjóri 365, neitaði að tjá sig um málið fyrir fréttir, enda væri það alfarið ritstjórnarlegs eðlis.