Seltirningar völdu S-tillögu

Meirihluti Seltirninga veitti í gær svokallaðri S-tillögu brautargengi í almennum kosningum um skipulag í bænum. Kosið var milli tveggja tillaga um framtíðaruppbyggingu á Hrófskálamel þar sem frystihúsið Ísbjörninn stóð áður og við Suðurströnd. Deilt var um hvort gervigrasvöllur ætti að vera austan eða vestan við íþróttamiðstöð bæjarins. S-tillaga gerir ráð fyrir að gervigrasvöllurinn kæmi vestan við íþróttamiðstöðina við Suðurströnd og að á Hrólfsskálamel verði byggðar 90 nýjar íbúðir fyrir um það bil 240 íbúa. H-tillagan gerði hinsvegar ráð fyrir því að gervigrasvöllurinn yrði settur niður á Hrólfsskálamel og að íbúðarbyggð yrði reist þar sem S-tillaga gerir ráð fyrir vellinum. Samkvæmt H-tillögunni yrðu byggðar 130 nýjar íbúðir sem hýsa myndu um 350 íbúa. Þegar blaðið fór í prentun var búið að telja um tvo þriðju hluta greiddra atkvæða og hafði S-tillagan hlotið um 56 prósent gegn um 42 prósentum H-tillögunnar. Um 52 prósent kosningabærra manna greiddu atkvæði. Gervigrasvöllurinn verður því þar sem malarvöllurinn er nú, sunnan við Valhúsaskóla og vestan við íþróttamiðstöðina. Niðurstöður kosninganna eru bindandi fyrir bæjarstjórn. "Ég gleðst mjög yfir þessu," segir Þór Whitehead, ötull stuðningsmaður S-tillögunnar. "Þarna kemur fram vilji fólksins, ef úrslit ráðast eins og fyrstu tölur benda til." Þá segist Þór einnig fagna hversu margir tóku þátt í kosningunni og skynsemin hafi sigrað í baráttunni fyrir betra skipulagi á Seltjarnarnesi. "Við lítum svo að þessi barátta, sem hófst í fyrra gegn skipulagstillögum sem bæjarstjórnin hafði sameinast um, hafi skilað lokaárangri í þessum úrslitum."