Hriktir í stoðum R-listans

Á fundi fulltrúaráðs Samfylkingarfélagnna í Reykjavík á miðvikudag var almenn sátt meðal fundarmanna um að leggja til að haldið yrði prófkjör meðal flokkanna þriggja, sem standa að R-listanum, þar sem borgarbúar fengju að koma að ákvörðun um vægi einstaklinga og flokka á listanum. Hugmyndir Samfylkingarinnar munu verða lagðar fram á fundi viðræðunefndarinnar sem kemur næst saman eftir rúma viku en Samfylkingin hefur talið að hlutur flokksins í R-listanum eigi að vera töluvert meiri en annarra flokka þar sem flokkurinn mælist með meira fylgi en hinir tveir. Þannig verður að líkindum lagt til að hverjum hinna þriggja verði tryggt eitt sæti af átta efstu sætunum en aðrir verða valdir með meirihlutakosningu í prófkjöri. "Það komu fram sjónarmið á þessum fundi að tryggja sem mest aðkomu Reykvíkinga að þessu framboði og allt annað eru tæknilegar útfærslur. Ýmis sjónarmið í þessa veru hafa heyrst áður frá okkar fólki og eru þekkt. En aðalatriðið er það að stjórnin fékk umboð til að halda viðræðunum áfram," sagði Páll Halldórsson, sem var endurkjörinn formaður fulltrúaráðs Samfylkingarinnar á fundinum. Anna Kristinsdóttir, borgarfulltrúi R-listans í Framsóknarflokki, segir að hún geri ekki ráð fyrir að sinn flokkur samþykki slílka tillögu. "Ef þetta er leið sem verður lögð til, geri ég ráð fyrir því að við viljum fara fram á okkar eigin forsendum en ég get ekki talað nema fyrir sjálfa mig. Ef Samfylkingin ákveður að fara fram sér þá held ég líka að meirihlutinn í borginni sé í uppnámi," segir Anna. Svandís Svavarsdóttir, hjá Vinstri-grænum, segir að ef slík tillaga komi fram þá sé hún ekki vænlegur kostur. "Ef menn vilja fara í einhverjar styrkleikamælingar innan R-listans er líklega best að hver flokkur geri það á sínum forsendum. Við höfum alltaf haft það að leiðarljósi að flokkarnir ættu að hafa jafna aðkomu að R-listanum," segir hún.