Arabar og lögregla tókust á í Íran

Að minnsta kosti einn lést í átökum araba og öryggissveita í borginni Ahvaz í suðurvesturhluta Írans í dag. Samkvæmt IRNA-fréttastofunni gengu arabar, sem eru minnihlutahópur í Íran, um götur borgarinnar og létu ófriðlega en lögregla svaraði þeim með því að skjóta á hópinn og beita táragasi. Talið er að arabarnir hafi verið að berjast fyrir sjálfstæði Khuzestan-héraðs sem hefur að geyma margar af bestu olíulindum Írans. Stjórnvöld í Íran hafa alfarið neitað því og benda á að spenna milli þjóðarbrota hafi aukist í kjölfar þess að fölsuðu bréfi frá ráðgjafa Khatamis, forseta landsins, var dreift meðal araba, en þar er lagt til að þeir verði fluttir úr suðrinu til norðurhluta landsins.