Verklagi breytt hjá Sýslumanni

Verklagsreglum hjá Sýslumannsembættinu hefur verið breytt hvað varðar eyðingu gagna og verða þau hér eftir geymd í læstum gámi innanhúss þar til þau fara til förgunar. Rúnar Guðjónsson, sýslumaður í Reykjavík, segir að það sé enn óútskýrt hvers vegna gömlum gögnum var ekki fargað á réttan hátt en Stöð 2 hafði undir höndum möppu þar sem nöfn hundruð einstaklinga, sem reka hafa þurft mál sín fyrir embættinu, komu fram. Sýslumaður harmar það sem gerðist en vill benda á að ekki hafi verið beinlínis um trúnaðargögn að ræða, heldur hafi í möppunum verið svokallaðir vaktalistar þar sem skráð var hvenær tiltekin mál væru tekin fyrir. Engu að síður sé þetta óviðunandi og að nauðsynlegt hafi verið fyrir embættið að bregðast við.