Náðu að lama krabbameinsfrumur

Vísindamenn hafa fundið aðferð til að lama krabbameinsfrumur og fá þær einfaldlega til að fremja sjálfsmorð. Þessar niðurstöður eru kynntar í hinu virta tímariti Genes and Development. Það voru vísindamenn við dönsku krabbameinsvarnamiðstöðina sem gerðu þessa uppgötvun. Í tilraunum sínum létu þeir gervisameindir ráðast á mismunandi krabbameinsfrumur, þar á meðal þrjár gerðir sem finnast í brjóstakrabbameini og eina tegund sem finnst í lifrarkrabba. Niðurstöðurnar voru að þessar sjúku krabbameinsfrumur frömdu hreinlega sjálfsmorð innan nokkurra daga þar sem þær gátu ekki lengur framleitt ákveðna tegund prótíns. Það prótín á ríkan þátt í að halda krabbameinsfrumum á lífi. Vísindamennirnir á bak við þessa uppgötvun binda vonir við að þróa megi lyf sem byggist á þessum rannsóknum en undirstrika að það sé ekki handan við hornið, enn þá sé nokkurra ára tilrauna- og rannsóknarferli fram undan.