Ekki aðeins pyntingar í Abu Ghraib

Svo virðist sem Bandaríkjaher noti pyntingar á kerfisbundinn hátt til að yfirheyra fanga. Komið hefur í ljós að bandarískir hermenn hafa ekki bara stundað pyntingar í Abu Ghraib fangelsinu í Írak og á Guantanamo á Kúbu, heldur líka í Afganistan. Ljósmyndirnar frá Abu Ghraib hafa með réttu vakið hörð viðbrögð um allan heim en nú hefur komið í ljós að þessar pyntingar eru á engan hátt einsdæmi. Bandarískir hermenn í Afganistan notuðu svipaðar aðferðir, settu poka yfir höfuð fanga, bundu þá saman, settu á svið aftökur og tóku myndir af öllu saman. Þegar Abu Ghraib myndirnar komu fram á sjónarsviðið urðu hermennirnir sem voru í Afganistan hræddir og eyðilögðu þær myndir sem þeir höfðu tekið af svipuðum atvikum. Þetta er meðal þess sem lesa má um í margvíslegum skjölum og minnisblöðum frá bandarísku alríkislögreglunni FBI sem hafa verið lögð fram í dómsmáli sem bandarísku mannréttindasamtökin American Civil Liberties hafa höfðað á hendur Bandaríkjastjórn til að fá úr því skorið hvort kerfisbundið sé brotið á föngum í haldi stjórnarinnar. Jameel Jaffer, lögfræðingur American Civil Liberties, segir að skjölin sýni að misþyrmingarnar séu ekki einangruð tilvik heldur hafi þær verið kerfisbundnar og útbreiddar. Föngum hafi ekki bara verið misþyrmt í Abu Ghraib í Írak heldur um gervallt Írak og Afganistan og einnig á Guantanamo-flóa. Í þessum skjölum má líka lesa umkvartanir bandarískra hermanna til sinna yfirmanna í Washington þar sem þeir segjast hafa orðið vitni að því hvernig bandarískir sérsveitarhermenn réðust á óbreytta, almenna borgara í tveimur þorpum í Afganistan í maí á síðasta ári.