Nemendur streyma í blikkið

Nemendum í iðn- og tæknigreinum hefur fjölgað talsvert síðustu ár. Þannig voru 3.675 skráðir í iðn- og tæknigreinar árið 2000 en 3.883 nemendur skráðir í hittifyrra. Nemendum í grunndeild málmiðna fjölgaði um 15 prósent milli ára. Í hittifyrra voru þeir 258 talsins en í fyrra voru þeir 296. Þetta gerist þrátt fyrir að útlendingum fjölgi sífellt í þessum greinum á vinnumarkaði. Útlendingar eru í auknum mæli ráðnir til starfa í almennri byggingarvinnu, sérstaklega til hefðbundinna trésmiðastarfa. Margir eru ráðnir í blikksmíði, til uppsetningar loftræstikerfa en fyrirtækið Stjörnublikk hefur notað portúgalska leigustarfsmenn í mörg ár og eru þau mál til skoðunar hjá Yfirskattanefnd. Útlendingar verða líka sífellt fjölmennari í málmiðnaði, sérstaklega í suðuvinnu, en hefð er fyrir því í skipasmíðaiðnaði að sækja starfsmenn til Póllands. Samkvæmt upplýsingum hjá menntamálaráðuneytinu er aðsókn í iðn- og tæknigreinar sveiflukennd. Aukning hafi verið síðustu ár en lægð hafi verið árið á undan. Skólarnir séu hugsanlega ekki að útskrifa nægilega marga auk þess sem þeir nemendur sem nú streymi í þessar greinar eigi eftir að skila sér út á vinnumarkaðinn. Áhrif aukinnar aðsóknar skili sér ekki fyrr en eftir fjögur til sex ár. Vinnuaflsþörfin sé gríðarlega mikil þessi misserin og þess vegna sé svo mikil eftirspurn eftir útlendingum til starfa. Tæplega helmingur ungs fólks útskrifast með annað próf en stúdentspróf. Örn Friðriksson, formaður Félags málmiðnaðarmanna, segir að ekki hafi verið neinni hvatningu haldið á lofti af hálfu stjórnvalda að neinir sæktu iðn- og tæknigreinar heldur hefði fyrst og fremst verið horft til háskólanáms. "Þegar íslensku varðskipin eru send til Póllands í annað skipti á fjórum árum þá dregur ungt fólk af því ákveðnar ályktanir. Þarna vantar mikið á að kynna möguleikana sem málmiðnaðargreinar hafa," segir hann.