Fjöldi ábendinga um svart vinnuafl

Lögreglan í Reykjavík og Útlendingastofnun hafa sett sig í samband við Samiðn, samband iðnfélaga, og óskað eftir samstarfi vegna gruns um fjölda útlendinga í ólöglegri atvinnustarfsemi hér á landi, að sögn Finnbjörns A. Hermannssonar formanns Samiðnar. "Við munum að sjálfsögðu þiggja það," sagði Finnbjörn, sem sagði jafnframt að þessi tilmæli hefðu borist sambandinu í kjölfar umræðu í fjölmiðlum um slíka starfsemi hér. Yrði þeim svarað í vikunni og reynt að koma á fundi fulltrúa Samiðnar, lögreglunnar og Útlendingastofnunar. "Við ætlum ekki að fara að stilla okkur upp sem eitthverju eftirlitsvaldi hér á landi," sagði Finnbjörn enn fremur. "Þetta er á forræði opinberra aðila, en við erum tilbúnir til að vinna með þeim ef það hjálpar eitthvað. Við lítum svo á að þetta sé fyrst og fremst á ábyrgð stjórnvalda." Samiðn vinnur nú að könnun á starfsemi með ólöglegt erlent vinnuafl og stendur hún fram á vorið. Hlutur erlenda vinnuaflsins er aðeins hluti af þeirri könnun, því hún nær til þess hverjir eru almennt að vinna störf iðnaðarmanna. Hörgull er á þeim þessa dagana, að sögn Finnbjörns, og þá fara aðrir í störfin. "Við erum búnir að fá alveg aragrúa af ábendingum og upplýsingum, þannig að það fer ekkert á milli mála, að við höfum síst verið of stórtækir í yfirlýsingum um fjölda," sagði Finnbjörn. "Þetta kemur frá fólki sem veit um vinnuafl af þessu tagi í sínu umhverfi og vill láta okkur vita. Við viljum fá einhvern farveg hjá opinberum aðilum, hvernig við förum með þessar upplýsingar, bæði það sem kemur til okkar frá utanaðkomandi og eins það sem eftirlitsmenn okkar verða varir við, því við erum auðvitað með okkar vinnustaðaeftirlit samt sem áður. En það snýr ekki einungis að útlendingum, heldur er um almennt vinnustaðaeftirlit að ræða. Og þetta ólöglega vinnuafl er víðar heldur en í byggingariðnaði." Finnbjörn sagði að samkvæmt orðrómi væru ólöglegir starfsmenn með 4 - 800 krónur á tímann í dagvinnu, á meðan íslenskur smiður með réttindi væri að fá 14 - 1600 á tímann. "Við höfum mikinn áhuga á að nálgast þessa menn og aðstoða þá við að innheimta rétt laun," sagði Finnbjörn.