Iceland Express fjölgar flugleiðum

Iceland Express hyggst fjölga áfangastöðum sínum í níu í stað þeirra þriggja sem nú er flogið til. Gert er ráð fyrir að frá og með maí árið 2006 muni flugfélagið hefja flug til Bergen í Noregi, Stokkhólms og Gautaborgar í Svíþjóð, Hamborgar, Berlínar og Friedrichshafen í Þýskalandi. En þeir áfangastaðir, sem félagið flýgur nú til, eru Kaupmannahöfn, London og Frankfurt-Hahn. Birgir Jónsson, framkvæmdastjóra Iceland Express segir að flug til Fraknfurt-Hahn hafi gengið gríðarlega vel og að greinilega séu sóknartækifæri á þýska markaðnum. Þá hafi fyrirtækið farið að líta í kringum sig og þá valið þessar flugleiðir sem um ræðir og fyritækið telur að þær skili góðri jöfnun á markaðnum. Þá segir hann að til að byrja með verði flogið tvisvar til fjórum sinnum í viku á nýju áfangastaðina og verður byrjað að selja ferðir til þeirra í október á þessu ári. Birgir segir þetta þýða geysilega eflingu á flugstarfsemi félagsins og mikla tekju- og veltuaukningu. Iceland Express hefur lýst því yfir að hagnaður verði af rekstri félagsins á þessu ári og nú er ljóst að afkoma af rekstrinum verður jákvæð. Hversu jákvæð er þó of snemmt að segja til um. Félagið mun til að byrja með bæta einni flugvél við flugflota sinn og segir Birgir að það nægi til þess að halda uppi þeirri flugtíðni sem nú hafi verið ákveðin. Hann segir að þetta sé gífurleg aukning hjá Iceland Express og telur að þetta verði látið duga í bili en að mikill sóknarhugur væri innan fyrirtækisins.Hann sagði að hugsanlega yrðu teknir fleiri staðir en vildi ekki segja nákvæmlega hvaða staðir það væru.