Wolfowitz fagnar skuldasamningi

Paul Wolfowitz, forstjóri Alþjóðabankans, bar í gær lof á sögulegt samkomulag sem náðst hefur um niðurfellingu skulda nokkurra fátækustu ríkja heims. Hann sagðist jafnframt vongóður um að samkomulag myndi takast bráðlega um að létta skuldabyrði Nígeríu, skuldugasta lands Afríku. Wolfowitz lét þessi orð falla í Abuja, höfuðborg Nígeríu, en það var fyrsti viðkomustaðurinn í Afríkuheimsókn hans, þeirri fyrstu sem hann fer í eftir að hann tók við stjórn Alþjóðabankans, sem hefur það hlutverk að styðja við framfarir í þróunarlöndum. Fjármálaráðherrar átta helstu iðnríkja heims, G8-hópsins svonefnda, sömdu um það á laugardaginn að 40 milljarða dollara skuldir átján fátækra ríkja skyldu felldar niður. Flest eru þessi ríki í Afríku. Stór hluti skuldanna var við alþjóðlegar lánastofnanir, ekki síst Alþjóðabankann. Alls nema erlendar skuldir Afríkuríkja um þessar mundir um 300 milljörðum dollara, andvirði yfir 19.000 milljarða króna. Wolfowitz fullyrti að skuldaniðurfellingin "myndi ekki koma niður á nýjum framlögum til þróunaraðstoðar". Ríku löndin hefðu nú um helgina heitið einum milljarði dollara, 64 milljörðum króna, í viðbótarframlög til fátækustu ríkjanna. G8-ráðherrarnir hétu því að leggja fram aukafé til að bæta Alþjóðabankanum og Afríska þróunarbankanum upp tapið sem skuldaniðurfellingin hefur í för með sér. Nígería er fjölmennasta og jafnframt skuldugasta land Afríku. En þar sem það er einn stærsti olíuútflytjandi heims uppfyllir það ekki skilgreiningu Alþjóðabankans um lágtekjuland. Og spillt stjórnsýsla hefur ekki hjálpað til heldur. Samningar um eftirgjöf skulda Nígeríu eru því flóknari en allra fátækustu ríkjanna. Tony Blair, forsætisráðherra Bretlands, sem verður gestgjafi á leiðtogafundi G8-ríkjanna í Skotlandi í júlí, mun í dag hitta Vladimír Pútín Rússlandsforseta í Moskvu og Gerhard Schröder Þýskalandskanslara í Berlín á ferð sinni milli höfuðborga ríkjanna átta þar sem hann reynir að afla stuðnings við metnaðarfulla áætlun sína um stóraukna þróunaraðstoð og heimsátak gegn loftmengun.