Ætlar ekki að kaupa Fowler

Nigel Worthington hafði skýr svör þegar hann var inntur eftir því hvort Norwich væri að kaupa Robbie Fowler frá Manchester City í janúar. Fowler hafði sést í nágrenni leikvallar félagsins og því fóru sögusagnir á kreik um að hann væri á leið í fyrstu deildina.

"Robbie Fowler er auðugur maður og ég er ekki að leita að ríkum mönnum í mitt lið, mig vantar menn sem eru hungraðir," sagði Worthington og gerði grín að öllu saman. "Kannski hefur hann bara verið að kaupa sér hús hérna, ég hef heyrt að hann eigi 80 hús - hann ætlar kannski að eignast eitt í viðbót."