Fer Keane frá United?

Roy Keane, fyrirliði Manchester United segist ekki eiga von á öðru en hann muni yfirgefa félagið næsta sumar þegar samningur hans rennur út. "Ég yrði hissa ef Man. Utd. myndi bjóða mér nýjan samning. Það er mín tilfinning. Ef Man. Utd. myndi bjóða mér samning yrði það í kringum apríl og þá yrði það of seint. Ég vil hafa hlutina á hreinu í janúar," sagði Keane í viðtali við sjónvarpsstöð Man. Utd. í gær. Keane sagði að hann ætti afar erfitt með að hugsa sér að spila með öðru félagi í úrvalsdeildinni en Man. Utd. Hann segist geta hugsað sér að fara í þjálfun en þá sé best fyrir sig að fara eitthvað annað og takast á við ný verkefni hjá nýju félagi.