Áhlaup til frelsunar gísla

Íraskar öryggissveitir, studdar af bandarískum hermönnum, umkringdu í gær bæinn Madain suður af Bagdad, þar sem að sögn yfirvalda voru gerð áhlaup til að frelsa um fimmtán fjölskyldur sjía-múslíma sem var haldið í gíslingu af herskáum súnní-múslímum. Óttast var um afdrif fleiri fjölskyldna í bænum og talsmenn Íraksstjórnar sögðu hugsanlegt að efnt yrði fyrir vikulokin til sameiginlegrar allsherjarárásar íraskra og bandarískra hermanna til að uppræta hina herskáu. Á þingfundi í Bagdad hvöttu þingmenn til þess að gerð yrði gangskör að því kveða niður uppreisnina á kjarnasvæði súnnía í Mið-Írak, en á því svæði var stuðningur við stjórn Saddams Husseins á sínum tíma mestur. Nýskipaður forsætisráðherra, sjíinn Ibrahim al-Jaafari, er nú að reyna að fá fulltrúa súnnía til að taka sæti í ríkisstjórn hans og því koma þessi átök trúarhópanna sér illa fyrir viðleitni hans til að mynda sannkallaða þjóðstjórn, skipaða fulltrúum allra helstu íbúahópa landsins.