Tugir teknir í gíslingu

Súnnískir uppreisnarmenn tóku tugi sjíamúslima í gíslingu í bænum Madain, nærri Bagdad, og hótuðu að myrða þá alla ef sjíar hefðu sig ekki allir á brott frá borginni. Gíslatakan í Madain fylgir í kjölfar sívaxandi spennu í borginni. Moska skemmdist þar í sprengjuárás á fimmtudag og á föstudag voru um það bil hundrað vígamenn farnir að flakka um borgina til að hafa uppi á sjíum til að taka í gíslingu. Heimamenn segja vígamennina vera aðkomumenn sem reyni að efna til átaka í Madain. Í það minnsta þrettán manns létust í átökum í gær. Sjö lögreglumenn fórust í sprengjuárás á veitingahúsi í Baquba, norðaustur af Bagdad. Uppreisnarmenn felldu þrjá þegar þeir skutu á hermenn og lögreglumenn í Kirkuk í norðurhluta Íraks. Í það minnsta einn óbreyttur borgari lét lífið í bílsprengjuárás nærri flugvellinum við Bagdad sem kostaði árásarmanninn einnig lífið. Lögregluforingi var skotinn til bana í borginni Kut og lögreglumaður lést eftir að bíll sem hann var í keyrði á jarðsprengju.