Hátt í 300 ný störf

Hátt í 300 ný, bein störf verða til ef þær þrjár verksmiðjur, sem nú er rætt um að rísi á Húsavík og nágrenni, verða að veruleika, segir Aðalsteinn Baldursson formaður Verkalýðsfélags Húsavíkur. Þessar þrjár verksmiðjur sem um ræðir eru glúkósamínsverksmiðjan, sem greint var frá í Fréttablaðinu í gær, polyol - verksmiðja sem er á teikniborðinu og loks álver. Polyol er flokkur efna, sem unnin er úr sykri í stað olíu eins og áður var, að sögn Tryggva Finnssonar framkvæmdastjóra Atvinnuþróunarfélags Þingeyinga. Hann sagði að framleiðslan væri í tilraunaferli erlendis eins og er, en mikla orku þurfi til framleiðslunnar. Þar kæmi Húsavík inn í myndina. Bjarni sagði að ríkið myndi verja hluta af andvirði Kísiliðjunnar til þessarar verksmiðju. "Glúkosamín verkasmiðja hér er mjög mikilvægt og gott mál," sagði Aðalsteinn Baldursson. "Auk allra annara kosta þá verður rækjuhratið, sem menn þurfa að urða með ærnum tilkostnaði í dag, notað við framleiðslu á kítíni og síðar glúkosamíni. Að þessu þarf að koma allur skalinn, sérfræðingar til almennra verkamanna." Varðandi staðsetningu álvers benti Aðalsteinn á að kjöraðstæður væru fyrir það á Húsavík. Þar væri gott land, góð höfn sem tilbúin yrði á næsta ári, auk þess sem stutt væri í orkuna. Ýmsir hafa sýnt áhuga á því að reisa álver á þessum slóðum, mismikinn þó. Samkvæmt heimildum Fréttablaðsins er Norðurál talið þar fremst í flokki, en fulltrúar þess hafi verið mikið á ferðinni á Húsavík til að skoða aðstæður, síðast nú í vikunni. "Við viljum að orkan sé nýtt hér heima fyrir," sagði Aðalsteinn. "Við erum tilbúnir til að taka við þessum fyrirtækjum. Við erum hér með öflugar sveitir og við sjáum fyrir okkur að þau hefðu svo mikil margfeldisáhrif að þau myndu styrkja landbúnaðinn. Með öðrum orðum, menn gætu unnið með búskapnum, sem hefur ekki rekstrarlega góða stöðu í dag. Við erum bjartsýnir hér, sem sýnir sig í því að hér er mjög lífleg sala í húsum og fasteignaverð hefur rokið upp að undanförnu."