Eru nálægt því að smíða vopn

Mohamed ElBaradei, yfirmaður Alþjóðakjarnorkumálastofnunarinnar IAEA, segir að ef Íranar komi kjarnorkuveri sínu í Natanz í gang muni það aðeins taka þá nokkra mánuði að smíða kjarnorkusprengju.

Í viðtali við breska blaðið In­dependent hvetur ElBaradei Vesturlönd og Íran til að láta af ögrunum sínum í garð hvers annars, sem hafa stigmagnast á undan­­förnum mánuðum, og semja þess í stað um kjarnorkuáætlun Írana.

Eftir að harðlínumaðurinn Mahmoud Ahmadinejad var kjörinn forseti Írans ákvað ríkisstjórn landsins að hefja fyrstu skref í auðgun úrans í kjarnorkuveri sínu í Isfahan en við það kólnuðu samskipti landsins við Vesturlönd.

Brigslyrðin hafa síðan gengið á víxl en á dögunum reyndu Rússar að miðla málum með því að bjóðast til að auðga úranið fyrir Írana, þó ekki svo mikið að það mætti nota í kjarnorkusprengjur. ElBaradei segist helst óttast að Íranar taki neðanjarðarstöð sína í Natanz á ný því þegar hún er komin í fulla notkun, eftir um það bil tvö ár, muni Íranar geta smíðað kjarnavopn á nokkrum mánuðum.

El Baradei segir þó ekki víst að það sé ætlun þeirra. Mohamed ElBaradei tekur við friðarverðlaunum Nóbels í Ósló á laugardaginn.