Þrjú ár frá árásinni á Bandaríkin

Hryðjuverkaárásanna í New York og Washington þann 11. september 2001 er minnst í dag. Á þeim þremur árum sem liðin eru hefur hryðjuverkum fjölgað í heiminum, al-Kaída samtökin lifa góðu lífi og Osama bin Laden gengur enn laus.  Minningarathafnir eru haldnar víða um heim í dag en þó aðallega í Bandaríkjunum. Ættingjar þeirra 2749 sem létu lífið í árásinni á tvíburaturnana í New York ætla að safnast saman við núllpunktinn svokallaða þar sem turnarnir stóðu og lesa upp nöfn fórnarlambanna. Nú, þremur árum síðar, á enn eftir að bera kennsl á um fjörutíu prósent þeirra sem létu lífið í turnunum. Svipuð athöfn verður í Pentagon í Washington þar sem 184 létust og farþeganna fjörutíu sem fórust með fjórðu flugvélinni í Pennsylvaníu-ríki verður einnig minnst. Stríðið gegn hryðjuverkum sem hófst í kjölfar árásanna stendur enn sem hæst en deilt er um árangurinn. George Bush Bandaríkjaforseti sagði á flokksþingi repúblikana að búið væri að handsama eða drepa um þrjá fjórðu af helstu leiðtogum al-Kaída. Margir vilja þó meina að það sé broguð aðferðafræði að telja hausa á þennan hátt. Taka verði tillit til þess hvort samtökin eða hugmyndafræðin sem þau standa fyrir séu að fá nýja fylgismenn til liðs við sig, jafnvel örar en Bandaríkjastjórn tekst að leita uppi þá gömlu.  Al-Kaída samtökin hafa einnig breyst mikið. Forsvarsmenn þeirra eru nú að mestu hættir að koma sjálfir beint að skipulagningu hryðjuverka. Í staðinn hafa samtökin tekið nokkurs konar hugmyndafræðilega forystu meðal þeirra hryðjuverkasamtaka sem berjast í nafni íslam og hópar um allan heim halda hryðjuverkum áfram í nafni málstaðarins. Á móti má þó segja að Osama bin Laden hafi heldur ekki tekist ætlunarverk sitt; að stefna öllu upp í loft í heiminum. Kannski er niðurstaðan því sú að ennþá stendur enginn uppi sem sigurvegari í þessu stríði.