Fjölmargra Norðurlandabúa saknað

Um það bil 3500 erlendra ferðamanna er enn saknað eftir hamfarirnar í Asíu, þar af um fimmtánhundruð Svía og fjögur hundruð og fimmtíu Norðmanna. Þarlend yfirvöld hafa verið gagnrýnd fyrir að hafa áttað sig seint á alvarleika málsins. Norðurlandabúar og þá sérstaklega Svíar og Norðmenn eru stór hluti þeirra erlendu ferðamanna sem saknað er á hamafarasvæðunum. Fundist hafa lík 473 erlendra ferðamanna en ljóst er að sú tala á eftir að hækka mikið. Yfirvöld bæði í Noregi og Svíþjóð hafa nú tekið við sér eftir að hafa verið mjög sein í gang vegna þessara hamfara og flugfélagið SAS ákvað í morgun að opna loftbrú á milli Norðurlanda og hamfarasvæðana til að flytja ferðamenn heim og hjálpargögn út. Þá er flugvél Loftleiða, dótturfélags Flugleiða, einnig á leið til hamfarasvæðanna til að sækja ferðamenn. Utanríkisráðherra Svía hélt blaðamannafundi í gær og utanríkisráðherra Noregs í morgun. Báðir segja hugsanlegt að um sé að ræða eitt mesta mannfalla sænskra og norskra ríkisborgara í einu vetfangi í áratugi. Leila Freivalds, utanríkisráðherra Svíþjóðar, sagði í gær að líklega hefðu ekki fleiri Svíar látist í einu síðan farþegaskipið Estonia sökk árið 1994 með þeim afleiðingum að yfir fimm hundruð Svíar féllu í valinn. Svavar Gestsson, sendiherra Íslands í Svíþjóð, segir að andrúmsloftið í landinu sé afar dapurlegt. Hann segir fréttir stöðugt allan sólarhringinn í landinu vegna hamfaranna og meðal frétta sem berist séu hjartaskerandi sögur af börnum sem týnt hafi foreldrum sínum. Hann segir sálfræðinga og presta vera til staðar á aflokuðu svæði og þeir þjónusti það fólk sem eigi um sárast að binda. Sænskir fjölmiðlar hafa í dag sagt sögu hins tveggja ára Hannesar Bergstrom sem kallaður er kraftaverkabarnið. Bandarískt par fann hann aleinan, vafinn inn í teppi og bjargaði honum undan flóðbylgjunni. Mynd hans var sett á netið og hann hefur nú komist til fjölskyldu sinnar. Pabbi hans er mikið slasaður og liggur á sjúkrahúsi en enn er leitað að móður hans. Af þeim erlendu ferðamönnum sem saknað er eru Svíar fjórði fjölmennasti þjóðarhópurinn, hinir eru Bretar, Frakkar og Þjóðverjar. Svavar segir að ferðamennska frá Svíþjóð til Taílands hafi verið meiri en í flestum öðrum Evrópulöndum. Því sé þetta enn sárara í Svíþjóð en víðast annars staðar í Evrópu. Meðal annars hafi fjöldi fólks frá Svíþjóð eytt jólum sínum í Taílandi undanfarin ár og því fólki hafi farið fjölgandi.