Vildi hækka fjárveitinguna 1998

Halldór Ásgrímsson lagði til við ríkisstjórnina fyrir sex árum að Mannréttindaskrifstofu Íslands yrði tryggð fjárveiting beint frá Alþingi og að hún yrði hækkuð úr sex milljónum í fimmtán milljónir. Sami stjórnarmeirihluti og var þá við völd afnam í gær alla fjárveitingu til Mannréttindaskrifstofunnar. Mannréttindaskrifstofa Íslands fékk átta milljónir á fjárlögum þessa árs. Fjórar milljónir eru bókfærðar frá utanríkisráðuneytinu og fjórar frá dómsmálaráðuneytinu. Í fjárlögum næsta árs voru milljónirnar frá dómsmálaráðuneytinu teknar í burtu en áfram var gert ráð fyrir fjórum milljónum frá utanríkisráðuneytinu, allt fram á síðasta dag sem fjárlaganefnd var með frumvarpið til meðferðar. Þann dag var framlag utanríkisráðuneytisins til mannréttindaskrifstofunnar fjarlægt og fær hún ekkert á fjárlögum næsta árs. Halldór Ásgrímsson forsætisræðaherra ritaði minnisblað til ríkisstjórnarinnar á vordögum 1998. Þar gat eftirfarandi skoðun Halldórs að líta: „Þetta fyrirkomulag, þ.e. opinbert framlag frá dómsmálaráðuneytinu, er ekki í samræmi við það sem tíðkast víðast annars staðar. Mikilvægt er að undirstrika sjálfstæði skrifstofunnar og styrkja starfsemi hennar.“ Síðar í minnisblaðinu segir: „Ennfremur er lagt til nýtt fyrirkomulag varðandi opinberan fjárstuðning við rekstur Mannréttindaskrifstofu Íslands, þ.e. að hann greiðist ekki lengur af dómsmálaráðuneyti. heldur þiggi skrifstofan fjárveitingu beint frá Alþingi í stað handhafa framkvæmdavaldsins, þ.e. samtals kr. 15.000.000.“ Fréttastofa leitaði skýringa Halldórs á muninum á afstöðu hans fyrir sex árum og niðurstöðu fjárlaga nú í dag, en án árangurs. Hann sagði hins vegar á þingi í fyrradag að ekki lægi fyrir ákvörðun um að skerða framlög til þessa málaflokks. Á heimasíðu mannréttindaskrifstofunnar má sjá að hún hefur á þessu ári gagnrýnt harðlega tvö frumvörp Björns Bjarnasonar dómsmálaráðherra; annað um málefni útlendinga og hitt um meðferð opinberra mála. Þá gagnrýndi mannréttindaskrifstofan einnig fjölmiðlafrumvarp forsætisráðherra.