Ýmist lífs eða liðinn

Jasser Arafat er ekki látinn að sögn utanríkisráðherra heimastjórnar Palestínu. Ónafngreindur heimildamaður innan heimastjórnarinnar sagði fyrr í dag að hann væri fallinn frá en því var vísað á bug síðdegis. Arafat er talinn eiga fáar klukkustundir eftir ólifaðar. Læknar á sjúkrahúsinu sem Jasser Arafat, forseti Palestínu, var fluttur á í París frá Ramallah, 29. október síðastliðinn, greindu frá því strax í morgun að heilsu hans hefði hrakað verulega. Hann var sagður í djúpu dái og talið að hann ætti einungis fáar klukkustundir eftir ólifaðar. Síðdegis var haft eftir ónafngreindum fulltrúa heimastjórnar Palestínu að Arafat væri látinn af völdum heilablæðingar. Talsmaður sjúkrahússins vísaði því hins vegar á bug og á blaðamannafundi sem Nabil Shaath, utanríkisráðherra heimastjórnar Palaestínu, boðaði til síðdegis í París var staðfest að Arafat,væri enn á lífi, en hann væri mjög alvarlega veikur. Arafat, sem er 75 ára, hefur legið í dái í sex daga en heimildamaður Palestínustjórnar, sem ekki vill láta nafn síns getið, segir líklegt að menn séu að reyna að draga það eins lengi og mögulegt er að senda út tilkynningu um dauða hans. Forsætisráðherra og utanríkisráðherra heimastjórnarinnar komu, ásamt leiðtoga í Frelsishreyfingu Palestínu, til Parísar til að ráðfæra sig við lækna Arafats en heimsókn þeirra hefur verið gagnrýnd harkalega af Shúu Arafat, eiginkonu Jassies Arafats, sem sakar þá um samsæri gegn eiginmanni sínum. Einn af nánustu aðstoðarmönnum Arafats sagði í dag að þegar leiðtoginn félli frá yrði hann jarðaður við höfuðstöðvar sínar í Ramallah á Vesturbakkanum. Ísraelsk yfirvöld, sem stjórna aðgangi að svæðinu, eru mótfallin því og vilja að hann verði jarðaður á Gasa-svæðinu.