Rosalega gott að reykja í þeim

"Ég hef nú svo sem ekki keypt mér neitt nýlega en ég fékk rosa töff támjóa Rockabilly-skó í jólagjöf í fyrra frá kærustunni minni," segir Henrik Baldvin Björnsson, söngvari hljómsveitarinnar Singapore Sling.

"Ég nota þessa támjóu skó rosalega mikið og er búinn að þurfa að láta sóla þá einu sinni. Ætli ég þurfi ekki að gera það aftur eftir svona hálft ár sökum notkunar. Þetta eru gæðaskór - ítalskt og gott í þessu og þeir eru voða töff. Ég nota þá mikið þegar ég er að spila og ganga. Síðan er voðalega gott að reykja sígarettur í þessum skóm - alveg extra-gott. Ég reyki mikið þegar ég klæðist þessum skóm, þeir hafa greinilega þessi áhrif á mig. Mér finnst það bara fínt," segir Henrik og er alls ekki á því að segja skilið við skóna til að hætta þessum ósið. "Ég stefni ekki að því að hætta að nota skóna og ég stefni ekki heldur að því að hætta að reykja."

En er samt ekki allt að gerast hjá Singapore Sling þrátt fyrir allar reykingarnar? "Það má svo sem segja það," segir Henrik af hógværð en platan Life is Killing my Rock n Roll er væntanleg í verslanir hér á Klakanum. "Ætli við förum ekki að túra í haust, kannski í október. Þá tökum við mánaðartúr í Ameríku. Reyndar eigum við að spila á Airwaves-hátíðinni en ef túrinn lendir á sama tíma og hátíðin þá þarf hátíðin því miður að víkja," segir Henrik sem væntanlega tekur Rockabilly-stígvélin með í túrinn.