Útihátíð eða ekki útihátíð

"Ég man ekki betur en þeir lögreglumenn sem komu hingað aukalega í fyrra hafi kvartað í fréttablöðin okkar hvað það væri nú rólegt og lítið að gera," segir Þór Vilhjálmsson, formaður stjórnar héraðssambands Íþróttabandalags Vestmannaeyja, ÍBV. Umræðan um löggæslukostnað úti á landi hefur komist í hámæli á ný eftir uppsteit forsvarsmanna Landsmóts Ungmennafélags Íslands sem lauk um síðustu helgi. Neituðu þeir lengi vel að greiða þá 1.5 milljón króna sem sýslumaður krafðist vegna löggæslukostnaðar. Ein stærsta útihátíð landsins hverja Verslunamannahelgi ár hvert er Þjóðhátíðin í Vestmannaeyjum og hafa aðstandendur hennar þurft að greiða tvær til þrjár milljónir aukalega vegna löggæslu undanfarin ár. Þór segir það stórundarlegt að þeim sé gert að greiða háar fjárhæðir vegna hátíðar sem á sér langa hefð meðal eyjaskeggja á sama tíma og skipuleggjendur hátíðar á borð við Eina með öllu á Akureyri sleppi algjörlega við slíkt. "Höfuðborgarsvæðið og Akureyri virðast vera stikkfrí gagnvart þessum aukakostnaði sem leggst á öll önnur mannamót í landinu. Þjóðhátíðin er hugsuð sem fjáröflun fyrir íþróttahreyfinguna hér í eyjunum og stór biti af því sem leggst til fer til löggæslu sem lítil sem engin þörf er á." Hann bendir á að hundruð björgunarsveitarmanna starfi á vegum ÍBV meðan á þjóðhátíð standi og sjaldan eða aldrei hafi komið upp sú staða að þær sveitir hafi ekki ráðið við öryggisgæslu í dalnum. Skipuleggjendur Einnar með öllu á Akureyri sleppa við allan löggæslukostnað bæði vegna þess að þar er ekki um ákveðinn aðila sem skipuleggur hátíðina, heldur félagasamtök sem kalla sig Vini Akureyrar, en einnig vegna þess að Ein með öllu er ekki hugsuð sem útihátíð. Akureyrarbær hefur árlega lagt rúmlega eina milljón króna til styrktar hátíðinni. Þór segir það sýna hversu auðvelt sé að sneiða framhjá reglum er settar hafa verið um löggæslukostnað vegna útihátíða. "Útihátíð eða ekki útihátíð. Þar tjalda þúsundir manna eins og hér. Þar eru skipulagðar uppákomur eins og hér og mér er fyrirmunað að skilja hver munurinn sé."