Nauðganir á Fílbeinsströndinni

Ofbeldismenn á Fílabeinsströndinni eru sakaðir um að nauðga hvítum konum sem reyna að flýja landið. Uppreisnarmennirnir hunsa friðarviðræður í Suður-Afríku. Skærur brutust út í síðustu viku þegar stjórnarher landsins rauf vopnahlé og varpaði sprengjum á norðurhluta landsins, þar sem uppreisnarmenn hafa haldið til frá því að þeir gerðu tilraun til valdaráns árið 2002. Franskar friðargæslusveitir hafa blandast í bardagana og allsherjar ringulreið hefur myndast. Suður-Afríkustjórn hefur boðið til friðarviðræðna en uppreisnarmenn segja engan tilgang í að ræða við Laurent Bagbo, forseta landsins, í ljósi þess að hann hafi ákveðið að rjúfa skilmála fyrra friðarsamkomulags. Erlendir borgarar flýja landið unnvörpum enda telja þeir bráða hættu stafa að sér. Ofbeldismenn tengdir stjórnvöldum eru sagðir hafa nauðgan nokkrum tugum hvítra kvenna þegar þeir hafa ráðist inn á heimili og vinnustaði Evrópubúa í landinu. Mennirnir, sem flestir eru ungir, segjast gera þetta í hefndarskyni fyrir aðkomu Frakka.