Stjórnvöld brugðust of seint við

Stjórnvöld í Svíþjóð og Noregi eru harðlega gagnrýnd fyrir að bregðast seint við afleiðingum hamfaraflóðanna í Suðaustur-Asíu. Forsætisráðherra Svíþjóðar segir að á annað þúsund Svía kunni að hafa farist. Ekki er vitað um afdrif á fimmta hundrað Norðmanna. Sænsku konungshjónin og Göran Person, forsætisráðherra Svíþjóðar, tóku þátt í minningarathöfn í Stokkhólmi í dag, um þá Svía sem farist hafa í hamfaraflóðunum í Suðaustur-Asíu, en þjóðarsorg hefur verið lýst yfir í Svíþjóð og Noregi á nýársdag, þar sem þetta er mesta mannfall í þessum löndum á friðartímum. Langflestir þeirra erlendu ferðamanna, sem fórust í flóðunum, voru Svíar, Norðmenn og Þjóðverjar, en talið er að hundruð Dana og Finna séu einnig meðal fórnarlambanna. Göran Person hefur staðfest að á fimmta tug Svía hafi látið lífið í flóðunum, en sænsk yfirvöld óttast að sú tala hækki í á annað þúsund, þar sem talið er að um fjórtán hundruð Svía sé saknað. Sænskir fjölmiðlar og ferðaskrifstofur segja hins vegar ekki vitað um afdrif allt að 4500 sænskra ferðamanna á flóðasvæðunum. Sænskir hjálparstarfsmenn hafa gagnrýnt stjórnvöld í Svíþjóð fyrir að bregðast ekki nægilega skjótt við ástandinu. Um tuttugu Norðmenn hafa fundist látnir eftir hamfarirnar í Tælandi, en um fjögur hundruð og þrjátíu er enn saknað. Loftbrú er á milli Skandinavíu og Tælands til að flytja hjálpargögn og sækja særða ferðamenn og aðra sem eiga um sárt að binda vegna hamfaranna. Jamtin Carin, þróunarmálaráðherra Svíþjóðar, segir stjórnvöld hafa verið nokkuð sein að taka við sér, en hins vegar geri þau nú allt sem í þeirra valdi stendur til þess að mæta aðstæðunum. Meðal annars verði sendir læknar og sálfræðingar á svæðið til þess að aðstoða fólk. Hins vegar sé afar erfitt að koma til móts við alla, því að gríðarlegur fjöldi Svía sé á svæðinu.