Fólk óánægt með sektirnar

Arnar Snæbjörnsson bílastæðavörður hefur verið starfinu sínu í tæp sjö ár. Hann byrjaði sem stöðumælavörður en er nú bílastæðavörður í Ráðhúsinu. "Það var stundum talsvert álag að vera úti við stöðumælavörsluna, fólk er auðvitað aldrei ánægt með sektirnar og lætur það stundum bitna á vörðunum. En við erum bara að vinna starfið okkar," segir Arnar. Nú sér Arnar um bílastæðahúsið undir Ráðhúsinu og stæðið í Vonarstræti og hefur aðsetur inni í Ráðhúsi. "Mér líka þetta vel, starfið er auðvitað frekar einhæft en á móti kemur að hér er margt skemmtilegt fólk og góður andi. Ég vinn alla virka daga frá 8-18 og er á bakvöktum þriðju hverja helgi. Bakvaktirnar felast meðal annars í að opna fyrir fólki sem hefur orðið innlyksa með bílana sína í bílastæðahúsum, en það gerist þó æ sjaldnar. Dagsdaglega hef ég umsjón með bílastæðunum, sel út laus stæði og passa að alltaf séu laus stæði fyrir fólk sem hefur keypt sér mánaðarkort. Ég aðstoða líka ef fólk lendir í vandræðum með sjálfsalann og þvíumlíkt." Arnar segist ekki fá miklar kvartanir enda séu ákveðnar vinnureglur í gangi. "Við bjóðum fólki einfaldlega að fylla út kvörtunareyðublöð og sendum þau svo til Bílastæðasjóðs sem skoðar málið." Hann segist ekki kvarta yfir kaupinu, en yfirvinnan sé auðvitað það sem heldur kaupinu uppi. "Svo eru ákveðin fríðindi, við fáum föt, afslátt af matarmiðum í Ráðhúsinu og frítt í strætó." En bílastæði? "Jú, við höfum bílastæði, en þurfum að víkja ef allt er orðið fullt," segir Arnar, og tekur undir að bílastæðin í miðbænum séu ekki nógu mörg.