Dagný lék sinn fyrsta leik með Portland í eitt og hálft ár

Dagný Brynjarsdóttir lék sinn fyrsta leik fyrir Portland Thorns í eitt og hálft ár þegar hún kom inn á sem varamaður í 0-2 sigri liðsins á Orlando Pride í 1. umferð bandarísku kvennadeildarinnar í gær.

Dagný kom inn á þegar 19 mínútur voru eftir af leiknum. Þá var staðan 0-2, Portland í vil.

Welcome back, @dagnybrynjars!

She replaces @CelBee in the 71st minute. #BAONPDX | #ORLvPORpic.twitter.com/B3VHykyT04

— Portland Thorns FC (@ThornsFC) April 14, 2019

Dagný lék síðast með Portland í 0-1 sigri á North Carolina Courage 14. október 2017, eða fyrir 18 mánuðum. Hún eignaðist sitt fyrsta barn í fyrra.

Landsliðskonan samdi aftur við Portland í janúar. Hún lék með liðinu á árunum 2016-17 og varð bandarískur meistari með því 2017.

Dagný lék sinn fyrsta leik síðan í október 2017 þegar hún kom við sögu í markalausu jafntefli við Kanada í Algarve-bikarnum 27. febrúar síðastliðinn. Hún lagði svo upp eitt marka Íslands í 1-4 sigri á Portúgal í Algarve-bikarnum 6. mars.

Portland varð bandarískur meistari 2017 en þurfti að gera sér silfrið að góðu í fyrra.