Innlent

800 milljónum varið í hestinn

Guðni Ágústsson landbúnaðarráðherra hefur varið nær 800 milljónum króna í verkefni tengd íslenska hestinum í ráðherratíð sinni. Það þýðir að árlega, frá árinu 2000, hafi um 130 milljónum af opinberu fé verið veitt í íslenska hestinn. Til viðbótar við þessar 800 milljónir er fjárveiting frá samgönguráðuneytinu vegna reiðvegagerðar. Stærstu upphæðirnar fóru í hrossabraut Hólaskóla og ráðunaut, sem sér meðal annars um skýrsluhald, eða rúmar 270 milljónir í hvort. Þetta kemur fram í nýjasta tölublaði Eiðfaxa.

Skapar tíu til fimmtán störf

Björn Bjarnason dómsmálaráðherra hefur ákveðið að innheimtumiðstöð sekta og sakarkostnaðar, vegna landsins í heild, verði komið upp á Blönduósi á næsta ári. Jóna Fanney Friðriksdóttir, bæjarstjóri Blönduósbæjar, segir að við það skapist á bilinu 10 til 15 ný störf í bæjarfélaginu og hluti þeirra verði líklega sérhæfð störf eins og lögfræði- og stjórnunarstörf.

Línumönnum sagt upp

Síminn hefur sagt sex starfsmönnum upp á Suðurlandi í hagræðingarskyni. Að sögn Evu Magnúsdóttur, upplýsingafulltrúa fyrirtækisins, verður fækkað um tvo starfsmenn á Selfossi, þrjá á Hvolsvelli og einn í Vík í Mýrdal.

Maður laus úr gæsluvarðhaldi

Manni sem setið hefur í gæsluvarðhaldi vegna rann­sóknar lögreglu á fíkniefnasmygli um pósthús í Reykjavík var sleppt á fimmtudag. Gæsluvarðhaldið hefði annars átt að renna út í gær. Að sögn Harðar Jóhannessonar, yfirlögregluþjóns í Reykjavík, hafa ekki aðrir verið handteknir vegna málsins enn sem komið er, en rannsókn þess heldur áfram.

3 á slysadeild eftir harðan árekstur

Tvö börn og ólétt kona voru flutt á slysadeild Landspítalans í Fossvogi eftir harðan árekstur tveggja bíla á Þorlákshafnarvegi í gærkvöld. Annar bíllinn var á leið norður eftir veginum í átt upp að þrengslavegi, þegar bíll sem ók vestur eftir veginum ók yfir stöðvunarskyldu og í veg fyrir hann.

Engar fangaflugsheimildir eru í gildi

Forsætisráðherra segir út í hött að yfirlýsing stjórnvalda frá 2003 um afnot Bandaríkjamanna af Keflavíkurflugvelli og flug í íslenskri lofthelgi í tengslum við Íraksstríðið gildi enn. Ekki augljóst mál segir Össur Skarphéðinsson.

Fjögur þúsund búin að kjósa

Tæplega 4.000 manns höfðu kosið í prófkjöri Sjálfstæðis­flokksins í Reykjavík klukkan níu í gærkvöldi. Að sögn Ágústs A. Ragnars­sonar, framkvæmda­stjóra Varðar, fulltrúaráðs sjálf­stæðis­félaganna í Reykjavík, er kjörsókn heldur meiri en fyrir síð­ustu borgar­stjórn­arkosningar.

Ísland er ekki bananalýðveldi

Björgólfur Thor Björg­ólfsson, stjórnarformaður ­Straums ­­­­­- Burðaráss, segist vera áhyggjufullur yfir þeim pólitíska stimpli sem Jón Ásgeir Jóhannesson, forstjóri Baugs, hefur gefið málaferlum á hendur Baugi. Það hafi leitt af sér vonda athygli. Hann telur að þáttur stjórnmálanna í framvindu málsins sé minni en gefið sé í skyn. Þetta kemur fram í langri grein sem birt var á vefsíðu breska blaðsins Financial Times í gær.

Fær ekki að hitta dóttur sína

Ekki hróflað við bensínstyrk

Svonefndur bensínstyrkur öryrkja og aldraðra verður ekki afnuminn eins og gert er ráð fyrir í fjárlagafrumvarpinu. Jón Kristjánsson heilbrigðisráðherra lýsti þessu yfir í utandagskrárumræðum á alþingi í gær um fjölgun og stöðu öryrkja.

Sjúklingar uggandi

Sjúklingar í lífsnauðsynlegri blóðskilun á nýrnadeild LSH eru uggandi vegna uppsagna sérhæfðra hjúkrunarfræðinga. Deila er risin vegna nýs vaktafyrirkomulags. Heilt ár tekur að þjálfa nýtt fólk í starfið.

Brotajárn varnarliðsins

Kafbátaleitarflugvél af gerðinni P-3 Orion var rifin í brotajárn á varnarstöðinni í Keflavík í fyrradag. Vélin hefur staðið þar um árabil sem minnismerki en nú liggur leið hennar til Hringrásar þaðan sem hún verður send til endurvinnslu.

Tuttugu milljörðum meiri sala

Heildarverðmæti seldra framleiðsluvara var 302 milljarðar á síðasta ári, sem er 20 milljörðum króna meira en árið áður og sjö prósenta aukning frá ári til árs, samkvæmt nýjum tölum frá Hagstofu Íslands.

Hægt að refsa hér á landi

Helgi Hjörvar, þingmaður Samfylkingarinnar, hefur sent Birni Bjarnasyni, dómsmálaráðherra bréf þar sem farið er fram á að hann fyrirskipi opinbera rannsókn á meintum flutningum fanga um íslenska lofthelgi á vegum bandarísku leyniþjónustunnar.

Alvarlega slös­uð eftir reiðtúr

TF-Líf, þyrla Landhelgis­gæsl­unnar var kölluð út í gær vegna konu sem dottið hafði af hest­­baki. Hún var um hádegisbil flutt á slysadeild Landspítala-háskóla­sjúkra­húss. Læknir í Laugarási hafði á tólfta tímanum samband við stjórnstöð Gæslunnar og óskaði eftir þyrlunni, en konan hafði verið á hestbaki við Syðra-Langholt í Hrunamannahreppi.

Staðan verri nú en við síðustu samninga

Samtök atvinnulífsins segja að ef gengið yrði til kjarasamninga nú myndu atvinnurekendur aldrei fallast á þær hækkanir sem samið var um í síðustu samningum, staða atvinnulífsins sé svo miklu lakari nú en þá vegna gengisþróunar.

Samningar 100 þúsund manns í hættu

Nái forsendunefnd kjarasamninga ekki saman fyrir 15. nóvember er hætta á að samningar hátt í 100 þúsund manns verði í uppnámi og fallið verði frá umsömdum launahækkunum sem taka áttu gildi næstu áramót.

Undirbýr útibú hér á landi

Hollenska starfsmannaleigan Inter-Galaxy hefur hafið undirbúning að stofnun útibús hér á landi. Forstjóri fyrirtækisins, Charles Ezedi, staðfestir þetta. Hann segist vita af þeim vanda sem starfsmannaleigur hafa valdið stjórnvöldum hér og segist tilbúinn að hjálpa til við að vinna úr þeim vanda.

Þrjú verðlaunuð fyrir starfsmenntastarf

Landsvirkjun, Efling og Ingibjörg Hafstað hlutu í dag starfsmenntaverðlaun Menntar og Starfsmenntaráðs. Ólafur Ragnar Grímsson forseti afhenti verðlaunin.

Dæmdur fyrir fíkniefnalagabrot

Rúmlega tvítugur Reykvíkingur var í dag dæmdur til þriggja mánaða skilorðsbundinnar fangelsisvistar fyrir fíkniefnabrot. Við húsleit á heimili hans fundust 97 grömm af hassi, sautján grömm af maríjúana, tæp tólf grömm af amfetamíni og 68 MDMA-töflur.

Útlit fyrir gjöfula skíðavertíð í Hlíðarfjalli

Meiri snjór er nú í Hlíðarfjalli en mörg undanfarin ár og útlit fyrir að Akureyringar fái langa og gjöfula skíðavertíð. Starfsmenn Skíðastaða eru búnir að troða brekkurnar og í dag var unnið að lokafrágangi á skíðalyftunum. Framkvæmdir við uppsetningu á búnaði til snjóframleiðslu í Hlíðarfjalli hófust 11. ágúst í sumar.

Um 4.000 greitt atkvæði hjá Sjálfstæðismönnum

Tæplega fjögur þúsund sjálfstæðismenn höfðu greitt atkvæði í prófkjöri Sjálfstæðisflokksins í Reykjavík þegar kjörfundi lauk klukkan níu í kvöld. Þar af höfðu um 1.200 greitt atkvæði utan kjörfundar.

Sérstakt ökunám vegna pallbíla

Þeir sem tóku bílpróf eftir 1. júní 1993 og keyra nú um á þungum, bandarískum pallbílum eða húsbílum, eru réttindalausir í umferðinni. Umferðarstofa hefur brugðist við aukinni útbreiðslu bíla þessarar gerðar með því að bjóða upp á sérstakt ökunám sem gefur réttindi á þessa millistærð af bílum.

Prófkjör hjá Samfylkingu í Hafnarfirði

Samfylkingarmenn í Hafnarfirði ganga til prófkjörs á morgun. Kjörfundur hefst klukkan tíu og eru rúmlega tvö þúsund félagar á kjörskrá. Úrslitin verða tilkynnt um ellefu leytið annað kvöld.

Stór skjálfti um kvöldmatarleytið

Skjálftahrina hófst austur af Grímsey á þriðja tímanum í dag og stendur enn. Stór skjálfti, 3,3 á richter, mældist um hálfátta-leytið í kvöld.

Úttekt á MÍ birt í næstu viku

Skýrsla Félagsvísindastofnunar Háskóla Íslands um úttekt á stjórnunarháttum og samskiptum innan Menntaskólans á Ísafirði verður birt í næstu viku.

Böðvar að hætta hjá Medcare

Böðvar Þórisson, framkvæmdastjóri Alþjóðasölu og Markaðssviðs Medcare, hefur sagt starfi sínu lausu.

Segir kaupmátt í sögulegu hámarki

Sérstök forsendunefnd Alþýðusambandsins og atvinnurekenda hefur ellefu daga til að úrskurða hvort grundvöllur kjarasamninga sé brostinn - vegna meiri verðbólgu en ráð var fyrir gert. Uppsögn kjarasamninga nú hefði skelfilegar afleiðingar fyrir allan vinnumarkaðinn, segir Ari Edwald og bendir á að kaupmáttur sé í sögulegu hámarki.

Örykjum hafi fjölgað um þrjá hvern virkan dag frá áramótum

Bílastyrkur til hreyfihamlaðra og aldraðra verður ekki afnuminn. Þetta tilkynnti Jón Kristjánsson, heilbrigðisráðherra á Alþingi í dag þegar hann svaraði spurningum Helga Hjörvars við utandagskrárumræðu um fjölgun öryrkja og kjör þeirra. Ráðherra sagðist aldrei hafa haldið því fram að fólk færi á örorkubætur að gamni sínu, en benti á að öryrkjum hafi fjölgað um þrjá hvern virkan dag frá áramótum til 1. október og við því yrði að bregðast með einhverjum hætti.

Telja kynslóð sem er við völd hafa afskrifað gamla fólkið

Eldri hjón, sem fréttastofa Stöðvar 2 hitti í dag, segjast kvíða því að lenda á hjúkrunarheimili og hugsanlega þurfa að skiljast að. Þau segjast hafa það á tilfinningunni að kynslóðin sem nú er við völd hafi afskrifað gamla fólkið.