Tap fyrir Englendingum

Íslenska kvennalandsliðið tapaði í kvöld 1-0 fyrir Englendingum í vináttuleik þjóðanna á Carrow Road í Norwich. Það var Karen Carney sem skoraði sigurmark enska liðsins skömmu fyrir leikslok.

Boro lagði Roma

Middlesbrough lagði Roma í fyrri leik liðanna í Evrópukeppni félagsliða á heimavelli sínum Riverside í kvöld 1-0. Það var framherjinn Yakubu sem skoraði eina mark leiksins á 12. mínútu og Boro því í ágætis stöðu fyrir síðari leikinn sem fram fer í Róm.

Framtíðin björt í Formúlu 1

Ron Dennis, yfirmaður McLaren-liðsins í Formúlu 1, telur að framtíð heimsmeistaramótsins sé björt og er bjartsýnn á að yfirstandandi deilur muni leysast á farsælan hátt. Nokkur af stóru liðunum í Formúlu 1 hafa undanfarið hótað að segja sig úr mótaröðinni og stofna sína eigin, því þeim þykir auðnum misskipt með núverandi fyrirkomulagi.

Keflvíkingar deildarmeistarar

Keflvíkingar eru deildarmeistarar í körfubolta karla eftir frækinn sigur á grönnum sínum úr Njarðvík á heimavelli í lokaumferð Iceland Express deildarinnar í kvöld 89-71. AJ Moye skoraði 37 stig fyrir Keflavík og Magnús Gunnarsson 18. Friðrik Stefánsson skoraði 18 stig fyrir Njarðvíkinga, Jeb Ivey 15 og Brenton Birmingham skoraði 14 stig.

Boro yfir gegn Roma

Middlesbrough hefur yfir 1-0 gegn Roma í leik liðanna í 16-liða úrslitum Evrópukeppni félagsliða sem fram fer á Riverside Stadium. Það var framherjinn Yakubu sem skoraði mark heimamanna úr vítaspyrnu á 12. mínútu leiksins, sem er sýndur í beinni útsendingu á Sýn.

Keflvíkingar leiða í hálfleik

Keflvíkingar hafa yfir 41-29 gegn grönnum sínum í Njarðvík í úrslitaleiknum um deildarmeistaratitilinn í úrvalsdeild karla í körfubolta, en leikurinn fer fram í Keflavík. Njarðvíkingar byrjuðu betur í leiknum og komust í 8-0 og leiddu 19-15 eftir fyrsta leikhluta. Síðan hafa heimamenn tekið öll völd á vellinum og hafa snúið leiknum sér í vil með mikilli baráttu.

Kominn tími til að vinna Chelsea

Martin Jol hefur náð frábærum árangri með lið Tottenham síðan hann tók við því snemma á síðasta ári, en þrátt fyrir að liðið sé í baráttu um sæti í Meistaradeildinni um þessar mundir, hefur það enn ekki náð að vinna sigur á einu af stóru liðunum í stjórnartíð Hollendingsins.

Nýr stjóri tilkynntur á næstu dögum

Forráðamenn Glasgow Rangers hafa nú tilkynnt að gengið verði frá ráðningu á eftirmanni Alex McLeish í stjórastöðuna hjá félaginu á allra næstu dögum. McLeish hefur verið við stjórnvölinn síðan 2002, en mun hætta í vor. Talið er víst að hinn Paul Le Guen muni taka við liðinu í vor, en hann var áður knattspyrnustjóri Lyon í Frakklandi.

Middlesbrough - Roma í beinni á Sýn

Fyrri leikur Middlesbrough og Roma í 16-liða úrslitum Evrópukeppni félagsliða verður sýndur í beinni útsendingu á Sýn klukkan 19:50 í kvöld. Steve McClaren á von á mjög erfiðum leik gegn Roma þó ítalska liðið verði án lykilmanna á Riverside í kvöld.

Jörundur tilkynnir byrjunarliðið gegn Englendingum

Jörundur Áki Sveinsson hefur nú tilkynnt byrjunarlið Íslands sem mætir Englendingum í vináttuleik í Norwich í kvöld. Þóra B. Helgadóttir mun þar taka við fyrirliðabandinu af systur sinni Ásthildi, sem getur ekki tekið þátt í leiknum vegna meiðsla.

Owen er á góðum batavegi

Forráðamenn Newcastle sáu í dag ástæðu til að árétta að stjörnuframherjanum Michael Owen hafi ekki slegið niður í endurhæfingu sinni frá fótbrotinu sem hann varð fyrir í leik á nýársdag, en breskir fjölmiðlar greindu frá því í morgun að hann hefði meiðst á ný.

Rio er dragbítur og Campbell er búinn á því

Enska knattspyrnuhetjan Jackie Charlton fer ekki fögrum orðum um leikmenn enska landsliðsins í nýlegu viðtali, þar sem miðverðirnir fá stærstu sneiðina af gagnrýni hans. Charlton segir að Rio Ferdinand gæti orðið skotmark á HM í sumar vegna kæruleysis með boltann og segir aukinheldur að Sol Campbell sé búinn á því og eigi ekki að fara með til Þýskalands.

Erum ekki í vinsældakeppni

Stjórnarformaður Chelsea, Bruce Buck, segir að ensku meistararnir hafi litlar áhyggjur af því að liðið sé ekki að vinna neinar vinsældakeppnir í knattspyrnuheiminum um þessar mundir, en félagið hefur verið gagnrýnt á margvíslegan hátt að undanförnu.

Pearce skrifar undir á næstu dögum

Stuart Pearce, stjóri enska úrvalsdeildarliðsins Manchester City, mun að öllum líkindum skrifa undir framlengingu á samningi sínum við félagið á allra næstu dögum, en hann hefur verið samningslaus síðan hann tók við af Kevin Keegan fyrir um ári síðan.

Óskar eftir fé til leikmannakaupa

Rafa Benitez segir að hann þurfi nauðsynlega að fara út að versla þegar opnar fyrir innkaupagluggann á Englandi á ný, því lið hans þurfi að styrkjast á ákveðnum sviðum.

Bryant eyðilagði heimkomu New Orleans

New Orleans Hornets spilaði í nótt fyrsta heimaleik sinn í endurnýjaðri heimahöll sinni í New Orleans síðan fellibylurinn Katrín lagði borgina í rúst í sumar, en því miður fyrir stuðningsmenn heimaliðsins voru það Kobe Bryant og félagar í LA Lakers sem komu í heimsókn. Bryant skoraði 18 af 40 stigum sínum í fjórða leikhluta og tryggði Lakers sigur 113-107.

Liðið er að smella saman

Arsene Wenger, stjóri Arsenal, var hæst ánægður með sína menn eftir að þeir slógu Real Madrid út úr Meistaradeildinni í gær eftir markalaust jafntefli á Highbury. Wenger segist sjá mikil batamerki á liðinu á síðustu tveimur mánuðum.

Misnotuð færi kostuðu okkur dýrt

Rafa Benitez var skiljanlega svekktur með að detta út úr meistaradeildinni í gær eftir að hans menn töpuðu 2-0 á heimavelli fyrir portúgalska liðinu Benfica. Leikmenn Liverpool fengu fjölda tækifæra til að skora í leiknum en inn vildi boltinn ekki og Evrópumeistararnir því úr leik.

Houston - Indiana í beinni

Viðureign Houston Rockets og Indiana Pacers verður sýnd í beinni útsendingu á NBA TV á Digital Ísland klukkan 1:30 eftir miðnætti í nótt. Indiana tapaði síðasta leik sínum illa á heimavelli fyrir slöku liði New York, en Houston hefur unnið þrjá leiki í röð og 13 af síðustu 17. Búist er við að Tracy McGrady verði með Houston í kvöld, en hann hefur átt við bakmeiðsli að stríða undanfarið.

Evrópumeistararnir úr leik

Evrópumeistarar Liverpool eru úr leik í Meistaradeild Evrópu eftir 2-0 tap á heimavelli sínum fyrir Benfica og samanlagt 3-0. Arsenal er komið áfram í keppninni eftir jafntefli við Real Madrid, AC Milan og Lyon eru sömuleiðis komin áfram í 8-liða úrslitin eftir stórsigra í sínum leikjum.

Haukar völtuðu yfir Keflavík

Haukastúlkur sendu hinum liðunum í Iceland Express deildinni skýr skilaboð í kvöld þegar þær tóku Keflvíkinga í kennslustund á útivelli 115-72., eftir að staðan hafði verið 55-42 fyrir gestina í hálfleik. Megan Mahoney fór á kostum í liði Hauka og skoraði 44 stig og Helena Sverrisdóttir skoraði 20 stig. Haukaliðið er langefst í deildinni og verður ekki auðsigrað í úrslitakeppninni ef svo fer sem horfir.

Stjarnan lagði KA fyrir norðan

Stjarnan vann í kvöld nauman sigur á KA 26-25 fyrir norðan í DHL-deildinni í handknattleik karla, eftir að hafa verið yfir 15-12 í hálfleik. Stórskyttan Tite Kalandadze var markahæstur í liði Garðbæinga með 7 mörk, en Jónatan Magnússon skoraði 9 mörk fyrir norðanmenn. Stjarnan er í fjórða sæti deildarinnar með 26 stig, en KA í því sjötta með 19. stig.

Magdeburg lagði Lemgo

Magdeburg, lið Sigfúsar Sigurðssonar og Arnórs Atlasonar í þýsku úrvalsdeildinni í handbolta, bar í kvöld sigurorð af Lemgo 30-28. Logi Geirsson skoraði 4 mörk fyrir Lemgo í leiknum og Ásgeir Örn Hallgrímsson skoraði 2, en Íslendingarnir hjá Magdeburg komust ekki á blað í leiknum.

Liverpool er undir í hálfleik

Nú er kominn hálfleikur í leikjunum fjórum í Meistaradeild Evrópu í knattspyrnu. Evrópumeistarar Liverpool eiga á brattann að sækja á heimavelli sínum Anfield, þar sem liðið er undir 1-0 í hálfleik og þarf því að skora þrjú mörk í þeim síðari til að komast áfram í keppninni.

Sakaður um steraneyslu

Ameríska hafnarboltastjarnan Barry Bonds er borin þungum sökum í bók eftir tvo íþróttafréttamenn sem kemur út á næstunni. Höfundar bókarinnar er sagðir færa rök fyrir því í bókinni að Bonds hafi á ótrúlega skömmum tíma breytt sér úr spretthörðum íþróttamanni í vöðvatröll og ekkert annað en steranotkun hafi geta orðið þess valdandi.

Hyypia á bekknum hjá Liverpool

Finnski varnarjaxlinn Sami Hyypia er á varamannabekk Liverpool þegar liðið tekur á móti Benfica í síðari viðureign liðanna í Meistaradeildinni. Leikurinn fer fram á Anfield og þarf Liverpool að skora minnst tvö mörk til að komast áfram. Peter Crouch og Fernando Morientes eru í fremstu víglínu hjá Liverpool. Leikurinn er í beinni útsendingu á Sýn.

Fyrsti heimaleikurinn síðan Katrín reið yfir

New Orleans Hornets spilar í kvöld sinn fyrsta leik á heimavelli síðan fellibylurinn Katrín reið yfir borgina þann 29. ágúst á síðasta ári, en liðið hefur spilað megnið af heimaleikjum sínum í Oklahoma City síðan þá. Liðið spilar aðeins þrjá leiki í New Orleans Arena í ár og sex leikir eru fyrirhugaðir þar á næsta tímabili.

Robinho aðvarar Arsenal

Brasilíski snillingurinn Robinho hjá Real Madrid hefur gefið út aðvörun á hendur leikmönnum Arsenal og skorar á þá að vanmeta ekki styrk spænska liðsins, sem sýndi sig glögglega um daginn þegar liðið var næstum búið að vinna upp fimm marka forskot Real Zaragoza í spænska bikarnum eftir að allir höfðu afskrifað liðið.

Við þurfum ekki Ronaldinho

John Terry og Frank Lampard hjá Chelsea segja að Chelsea þurfi ekki leikmenn eins og Ronaldinho til að vinna Meistaradeildina og benda á að Chelsea hafi í sínum röðum leikmenn sem geta breytt gangi leiksins upp á eigin spýtur með einstaklingsframtaki.

Ronaldinho er ekki til sölu

Roman Abramovich eigandi Chelsea virðist vekja ótta hvar sem hann kemur, því á blaðamannafundi eftir leik Barcelona og Chelsea þótti Frank Rijkaard ástæða til að taka það fram að peningar gætu ekki keypt snillinginn Ronaldinho frá Barcelona.

Alonso verður einbeittur

Pat Symonds, yfirhönnuður hjá meisturum Renault í Formúlu 1, segir að það muni ekki hafa nein áhrif á Fernando Alonso á keppnistímabilinu að hann hafi þegar samþykkt að ganga til liðs við McLaren árið 2007.

Chelsea á yfir höfði sér kæru

Englandsmeistarar Chelsea eiga yfir höfði sér kæru í kjölfar þess að leikmenn liðsins veittust að Mark Halsey dómara í viðureign sinni við West Brom á dögunum. Leikmennirnir veittust að dómaranum eftir að hann vísaði Arjen Robben af velli fyrir ljóta tæklingu. Leikmenn West Brom sleppa við refsingu í málinu.

Missir af 8-liða úrslitunum

Unglingurinn Lionel Messi hjá Barcelona getur ekki leikið með liði sínu í 8-liða úrslitum Meistaradeildarinnar eftir að hann reif vöðva í fæti í leiknum gegn Chelsea í gær og talið er að hann verði frá í að minnsta kosti mánuð. Þá verður Carles Puyol í leikbanni í fyrri leiknum í næstu umferð eftir að hann fékk gult spjald fyrir óþarft brot á Eið Smára Guðjohnsen í leiknum í gær.

Við vanmetum ekki Real Madrid

Arsene Wenger, stjóri Arsenal, hefur varað við of mikilli bjartsýni fyrir leikinn gegn Real Madrid á Highbury í Meistaradeildinni í kvöld og segir að þó sínir menn séu vissulega í góðri stöðu, sé Real Madrid hættulegt lið sem ekki megi vanmeta.

Getum skorað tvö mörk

Rafa Benitez hefur ekki áhyggjur af að hans menn nái ekki að skora þau tvö mörk sem liðið þarf á að halda í leiknum gegn Benfica á Anfield í kvöld, þegar liðin spila síðari leik sinn í Meistaradeildinni. Benfica vann fyrri leikinn 1-0.

Líklega frá út leiktíðina

Keppnistímabilið hjá Norðmanninum Ole Gunnar Solskjær hjá Manchester United er líklega á enda runnið eftir að í ljós kom að hann þarf í aðgerð vegna brákaðs kinnbeins sem hann hlaut í varaliðsleik með liði Manchester United í gær og talið er að hann verði allt að tvo mánuði að jafna sig.

Fyrsti Bretinn til að leika í Rússlandi

Skoski landsliðsmaðurinn Garry O´Connor er langt frá því að vera frægasti knattspyrnumaður í heiminum, en hann markaði þó þátt sinn í sögunni í gær þegar ljóst var að hann yrði fyrsti leikmaðurinn af Bretlandseyjum til að ganga til liðs við knattspyrnulið í Rússlandi.

Nýr verðlaunagripur afhentur í vor

Á föstudaginn verður kynntur nýr verðlaunagripur sem afhentur verður sigurvegaranum í Meistaradeild Evrópu eftir úrslitaleik keppninnar í vor. Steven Gerrard, fyrirliði Liverpool mun þá afhenda borgarstjóranum í París gripinn, sem hann mun hafa undir höndum fram að úrslitaleik keppninnar.

Aldrei verið eins stoltur af mínum mönnum

Alex McLeish var stoltur af sínum mönnum í gær þrátt fyrir að þeir hefðu fallið úr leik gegn sterku liði Villareal í Meistaradeildinni á mörkum skoruðum á útivelli. Leikurinn í gær endaði með jafntefli 1-1 á Spáni, en um tíma leit út fyrir að skoska liðið ætlaði að fara með sigur af hólmi.

Þakkaði Cannavaro fyrir markið

Brasilíski miðjumaðurinn Emerson hjá Juventus eignaði félaga sínum Fabio Cannavaro allan heiðurinn að sigurmarkinu sem hann skoraði í leiknum gegn Werder Bremen í Meistaradeildinni í gærkvöld, því eins og sást í endursýningum frá aðdraganda marksins, sneri Emerson baki í markvörðin Tim Wiese þegar hann missti boltann frá sér á klaufalegan hátt.

Solskjær með brákað kinnbein

Það gekk á ýmsu í varaliðsleik Manchester United og Middlesbrough í gærkvöldi, en norski sóknarmaðurinn Ole Gunnar Solskjær var fluttur á sjúkrahús eftir að hafa lent í samstuði við Ugo Ehiogu eftir aðeins sjö mínútna leik. Talið er að Solskjær sé með brákað kinnbein eftir óhappið.

Spyr mig af hverju ég gerðist markvörður

Tim Wiese, markvörður Werder Bremen hefur eflaust ekki sofið vel í nótt, því skelfileg mistök hans undir lok leiksins gegn Juventus í gærkvöldi urðu þess valdandi að Bremen missti af sæti í 8-liða úrslitunum í Meistaradeildinni. Wiese átti vart til orð til að lýsa líðan sinni eftir leikinn í gær.

Barcelona á skilið að vera komið áfram

Jose Mourinho gat lítið sagt eftir að hans menn féllu úr keppni í Meistaradeildinni á Nou Camp í gærkvöldi og viðurkenndi að úr því að Barcelona væri komið í næstu umferð keppninnar, ættu liðið það líklega skilið. Frank Rijkaard sagðist ekki hafa verið í hefndarhug, eftir tapið fyrir Chelsea í fyrra.

Göppingen lagði Minden

Jaliesky Garcia skoraði tvö mörk fyrir lið sitt Göppingen í þýsku úrvalsdeildinni í handbolta í gærkvöld þegar liðið vann nauman sigur á Snorra Steini Guðjónssyni og félögum í Minden 30-29 á útivelli. Snorri skoraði einnig tvö mörk fyrir Minden, sem er sem fyrr í botnbaráttu í deildinni á meðan Göppingen siglir lygnan sjó um miðja deild.

Fyrsta sigurganga New York í tvo mánuði

Botnlið New York vann í nótt annan leik sinn í röð í NBA deildinni í körfubolta þegar liði skellti Indiana nokkuð óvænt á útivelli 107-92, en þetta er í fyrsta sinn í tvo mánuði sem New York vinnur tvo leiki í röð og hafa báðir sigrar liðsins komið á útivelli. Jalen Rose skoraði 21 stig gegn sínum gömlu félögum, en þeir Peja Stojakovic og Stephen Jackson skoruðu 20 hvor fyrir Indiana.