Þakkaði Cannavaro fyrir markið

Brasilíski miðjumaðurinn Emerson hjá Juventus eignaði félaga sínum Fabio Cannavaro allan heiðurinn að sigurmarkinu sem hann skoraði í leiknum gegn Werder Bremen í Meistaradeildinni í gærkvöld, því eins og sást í endursýningum frá aðdraganda marksins, sneri Emerson baki í markvörðin Tim Wiese þegar hann missti boltann frá sér á klaufalegan hátt.

"Ég tók ekkert eftir því að boltinn var að rúlla rétt fyrir aftan mig, en það var Fabio sem kallaði á mig og lét mig vita. Ég brást sem betur fer rétt við og renndi boltanum strax í netið. Það var auðvitað heppnistimpill á þessu marki, en mér þótti við eiga sigurinn skilinn því við fengum miklu fleiri færi í leiknum. Við gáfumst ekki upp þó við fengjum á okkur markið og sýndum úr hverju við erum gerðir," sagði Emerson.

Þjálfari Juventus, Fabio Capello var ánægður með sigurinn en sagðist ekki geta annað en fundið til með markverði Bremen. "Við áttum skilið að vinna í kvöld þó sigurmarkið hafi komið eftir mistök markvarðarins. Þetta var ótrúlegt kvöld, því við gátum ekki með nokkru móti skorað hjá Wiese, en það tókst í lokin og ég get ekki annað en fundið til með honum - hann var stórkostlegur í leiknum," sagði Capello.