3000 ferðamenn á Íslandi um þessi áramót

Samkvæmt upplýsingum frá Samtökum ferðaþjónustunnar dvelja um 3000 ferðamenn á Íslandi um þessi áramót. Erna Hauksdóttir framkvæmdastjóri Samtaka ferðaþjónustunnar segir ferðamenn vera 15 prósentum fleiri um þessi áramót en þau síðustu.

Fiskafli hefur minnkað um 5% frá því í fyrra

Fiskafli hefur minnkað ár frá ári og er nær 5% minni á þessu ári en í fyrra. Rækjuafli hefur ekki verið minni í aldarfjórðung. Heildarafli ár er um 500 þúsund tonnum minni en hann var árið 2002 og hefur stigminnkað undanfarin ár. Verðgildi aflans hefur þó ekki dregist saman sem þessu nemur þar sem stöðugt er reynt að auka verðmæti þeirra tonna sem þó eru veidd.

Stjórnarandstaðan vill kalla saman þing til að fresta launahækkun Kjaradóms

Leiðtogar stjórnarandstöðuflokkanna gengu á fund forystumanna stjórnarflokkanna klukkan ellefu í morgun, þar sem Halldór Ásgrímsson forsætisráðherra reynir að höggva á þann hnút sem kominn er upp vegna ákvörðunar Kjaradóms um kjör þjóðkjörinna fulltrúa.

Útakakstur vegna hálku við Brú í Hrútafirði

Bíll fór út af veginum við Brú í Hrútafirði rétt fyrir hádegi. Engin slys urðu á fólki en ökumaður var einn í bílnum. Bíllinn er mikið skemmdur en mikil hálka var á veginum.

Eldur kviknaði í húsi á Kambsvegi

Slökkvilið Reykjavíkur var kallað út vegna elds í íbúðarhúsi á Kambsveg um klukkan hálf tólf. Íbúar hússins náðu að slökkva eldinn með slökkvitæki og koma sér út út húsinu áður en slökkviliðið kom á staðinn. Ekki hlaust af mikið tjón en reykræsta þurfti húsið.

Sjálfstætt starfandi hjartalæknar hafa sagt upp samningi við TR

Sjálfstætt starfandi hjartalæknar hafa sagt upp samningi við Tryggingastofnun ríkisins og taka uppsagnirnar gildi frá og með 1. apríl 2006. Ástæða uppsagnanna er sögð vera sú að ekki náðist samkomulag um nauðsynlegar breytingar á gildandi samningi Læknafélags Reykjavíkur og heilbrigðis- og tryggingamálaráðuneytisins fyrir hönd Tryggingarstofnunar ríkisins, þrátt fyrir margra mánaða samningstilraunir.

Íslandspóstur læsir póstkössum

Síðastliðin ár hefur Íslandspóstur læst póstkössum sem staðsettir eru utanhúss á höfðuborgarsvæðinu yfir áramót. Er þetta gert vegna ítrekaðra skemmda sem unnin eru á póstkössunum í kringum áramót.

Halldór býður sig fram í 1. sæti framboðslista sjálfstæðismanna

Halldór Halldórsson, bæjarstjóri Ísafjarðarbæjar, hefur ákveðið að bjóða sig fram í 1. sæti framboðslista sjálfstæðismanna til sveitastjórnarkosninganna í vor. Halldór vonast eftir góðum stuðning og stefnir að ná góðum árangri flokksins í kosningunum í vor, hljóti hann umboð sem oddviti framboðslistans.

Oktavía sökuð um að hafa farið á bak við kjósendur sína

Formaður Samfylkingarinnar á Akureyri sakar Oktavíu Jóhannesdóttur um að hafa farið á bak við kjósendur sína með ákvörðun sinni um að ganga til liðs við Sjálfstæðisflokkinn. Hann segir ákvörðun hennar koma sér á óvart þó Oktavía hafi ekki mætt á bæjarmálafundi í nokkra mánuði. Samfylkingarmenn vilja hana úr bæjarstjórn.

Mál Norðlingaölduveitu aftur í höndum nefndar um skipulag miðhálendisins

Umhverfisráðherra segir mál Norðlingaölduveitu nú aftur í höndum samvinnunefndar um skipulag miðhálendis. Ráðherra hafnaði tillögum nefndarinnar í gær á þeirri forsendu að lög sem sett voru í kjölfar úrskurðar setts umhverfisráðherra um veituna heimili ekki breytingar. Formaður Náttúruverndarsamtaka Íslands vill að nefndin taki veituna út af skipulaginu og stækki þar með friðlandið.

Aldrei hafa færri banaslys orðið á ársgrundvelli frá árinu 1941

Aldrei hafa færri banaslys orðið á ársgrundvelli frá árinu 1941 en í ár létust 28 einstaklingur í slysum hér á landi og þrír íslenskir ríkisborgarar létust af slysförum erlendis. Í ár urðu flest slys í tengslum við umferðina líkt og oft áður en alls voru 19 einstaklingar sem létust í 16 slysum.

Lýst er eftir brúnum yorkshire terrier

Lítill brúnn yorkshire terrier týndist í Seláshverfinu í gær og er sárt saknað af eigendum sínum. Litla krílið var gestkomandi ásamt eigendum sínum í Seláshverfinu í gærkvöldi þegar hann týndist þannig að hundurinn er ekki kunnugur á þeim slóðum. Allir sem séð hafa til ferða þessa brúna litla hunds er bent á að hafa samband við eigandann í síma 848-3647

Ráðist á konu á skemmtistað í Keflavík

Ráðist var á konu á skemmtistað í Keflavík í nótt. Lögregla og sjúkralið voru kölluð til og var konan flutt á Heilbrigðisstofnun Suðurnesja. Var konan nefbrotin og með áverka í andliti. Lögregla segir að vitað sé hver árásarmaðurinn var en hann var farinn af staðnum þegar lögregluna var að.

Vinstri grænir vilja færa út friðarmörk á miðhálendinu

Þingflokkur Vinstrihreyfingarinnar- græns framboðs skorar á samvinnunefnd miðhálendisins að hafna alfarið öllum hugmyndum um Norðlingaölduveitu og leggur til að ný tillaga að skipulagi á svæðinu sunnan Hofsjökuls verði auglýst, þar sem friðlandsmörk Þjórsárvera verði færð út.

3,2 miljónum króna varið til baráttunnar gegn mansali

Utanríkisráðherra hefur ákveðið að verja 3,2 milljónum króna til baráttunnar gegn mansali á vegum Öryggis- og samvinnustofnunar Evrópu. Samkvæmt fjárlögum fyrir árið 2005 voru fjórar milljónir króna til ráðstöfunar til stuðnings verkefnum á sviði mannréttindamála og hafði 800 þúsund krónum áður verið ráðstafað til Mannréttindastofnunar Háskóla Íslands.

Kveikt í rusli í sex ruslagámum

Slökkvilið Reykjavíkur hefur verið kallað út sex sinnum frá því um kvöldmatarleitið í gærkvöldi vegna elds í ruslagámum. Það er nokkuð mörg útköll en ástæðan er einkum sú að óprúttnir aðilar eru að kveikja á flugeldum og þvíumlíku í ruslagámunum með þeim afleiðingum að eldur brýst út. Eldurinn í ruslagámunum náði ekki að breyðast út en nokkuð tjón varð á gámunum. Ruslagámarnir sex sem kviknaði í eru staðsettir víða um borgina.

Alþjóðahús afhendir verðlaun

Forseti Íslands Ólafur Ragnar Grímsson afhendir í dag kl. 15:30 í Alþjóðahúsinu, Jónu Hrönn Bolladóttur, Bjarna Karlssyni, Hope Knútsson, og Kramhúsinu viðurkenningu Alþjóðahúss fyrir lofsverða frammistöðu í málefnum innflytjenda á Íslandi.  Viðurkenningarnar eru veittar í þremur flokkum; einstaklingur af innlendum uppruna, einstaklingur af erlendum uppruna, og fyrirtæki eða stofnun.

Hækkun hlutabréfa langt umfram spár

Hækkanir á skráðum hlutabréfum í Kauphöll Íslands hafa aldrei verið meiri á einu ári en á árinu 2005. Forstjóri Kauphallarinnar segir erfitt að spá um hvernig næsta ár þróast.

Svifryk yfir heilsuverndarmörkum á gamlárskvöld

Svifryk í borginni fer yfir heilsuverndarmörk á annasamasta tíma hinna skotglöðu á gamlárskvöld. Þetta kemur fram á vef umhverfissviðs Reykjavíkurborgar en þar á bæ búast menn við að 530 þúsund flugeldar seljist að þessu sinni og um 90 þúsund blys.

Hlutverk stjórnenda þurfa að vera skýr

Mikilvægi þess að hlutverk stjórnenda séu skýr og óhæði stjórnarmanna er meðal þess sem tekið er á í endurskoðuðum reglum um stjórnarhætti fyrirtækja.

Heimilt að fella allt að 909 hreindýr á næsta ári

Umhverfisráðuneytið hefur heimilað að veiða allt að 909 hreindýr á tímabilinu 1. ágúst til 15. september 2006, auk hreindýrakálfa sem fylgt hafa felldum kúm, en þá skal fella sé þess kostur. Þessi heimild er veitt með fyrirvara um að ekki verði verulegar breytingar á stofnstærð fram að veiðum sem kalli á endurskoðun fjölda veiðiheimilda.

Forsætisráðherra hafði ekki samráð við stjórnarandstöðu

Þingflokkar Samfylkingarinnar og Vinstri - grænna vilja að þingið verði kallað saman á morgun eða hinn, til að fresta gildistöku úrskurðar Kjaradóms um hækkun launa þjóðkjörinna fulltrúa og æðstu embættismanna. Formenn flokkanna segja rangt að forsætisráðherra hafi haft samráð við formenn þingflokkanna áður en hann ákvað að biðja formann Kjaradóms að endurskoða úrskurð sinn frá nítjánda desember.

Leikskólakennarar í Kraganum krefjast launaleiðréttingar

Óánægja leikskólakennara í sveitarfélögunum í kringum Reykjavík fer vaxandi og þeir krefjast þess að laun þeirra verði leiðrétt hið fyrsta. Þegar hafa ellefu kennarar á leikskóla á Seltjarnarnesi sagt upp störfum og frekari uppsagnir eru yfirvofandi bæði í þessum sveitarfélögum og í Reykjavík um áramótin verði ekki orðið við kröfum leikskólakennara um kjaraleiðréttingu.

Norðlingaölduveita aftur komin á byrjunarreit

Norðlingaölduveita er aftur komin á byrjunarreit eftir að umhverfisráðherra hafnaði því að staðfesta breytingar nefndar um skipulag miðhálendisins.

Avion kaupir fjórar Boeing 777

Avion Group gekk í dag frá kaupum á fjórum Boeing 777 vélum fyrir röska sextíu milljarða króna. Félagið hefur þar með samið um kaup á átta slíkum vélum og fær þær afhentar á undan flestum öðrum. Vélarnar verða einkum notaðar í flug á milli Evrópu og Asíu.

OR afhenti jólaskreytingarverðlaun í dag

Iðnustu skreytingamenn landsins fengu í dag viðurkenningu fyrir að lífga upp á borgina um jólin með ævintýralegum skreytingum af ýmsum toga. Venju samkvæmt hefur Orkuveita Reykjavíkur valið bestu jólaskreytingarnar í þeim bæjarfélögum sem veitusvæði Orkuveitunnar nær til. Í Reykjavík varð Urriðakvísl þrjú fyrir valinu og eins og sjá má á þessum myndum var það ekki að ástæðulausu. Fjölbreyttar ljósaskreytingarnar féllu vel í kramið hjá dómnefndinni.

Tvær og hálf milljón söfnuðust til styrktar SKB

Rúmlega tvær og hálf milljón söfnuðust á styrktartónleikum sem haldnir voru í Háskólabíói í kvöld til styrktar SKB eða Styrktarfélagi krabbameinssjúkra barna. Tónleikarnir eru orðnir að árvissum viðburði og fara fram við hver áramót.

Menntamálráðherra undirritar samninga um árangursstjórnun

Þorgerður Katrín Gunnarsdóttir, menntamálaráðherra undirritaði í dag árangursstjórnunarsamninga við menningarstofnanir menntamálaráðuneytisins.

Íhuga að bjóða fram foreldralista vegna leikskólavanda

Foreldrar leikskólabarna í Kópavogi ræða nú í fullri alvöru um að bjóða fram sérstakan foreldralista í bæjarstjórnarkosningum. Fjórir fílefldir starfsmenn hafa þó ráðist til starfa á leikskólann Dal en til stóð að loka deildum á skólanum sökum manneklu. Einn er sonur starfsmannastjóra bæjarins, annar dóttir fræðslustjórans og tveir eru fyrrverandi starfsmenn verktakafyrirtækis bæjarstjórans.

Ellefu manns í prófkjöri framsóknarmanna í Reykjavík

Ellefu manns gefa kost á sér í prófkjöri framsóknarmanna í Reykjavík sem fram fer 28. janúar næstkomandi, en framboðsfrestur rann út kl. 16 í dag. Þrír gefa kost á sér í fyrsta sætið, Anna Kristinsdóttir borgarfulltrúi, Björn Ingi Hrafnsson, aðstoðarmaður forsætisráðherra og Óskar Bergsson húsasmíðameistari.

Vélsleðamaður slasast í Fjörðum

Björgunarsveiti Landsbjargar á Akureyri og Grenivík voru kallaðar út á fjórða tímanum í dag. Vélsleðamaður hafði slasast í Fjörðum, norðan Grenivíkur. Fyrstu björgunarmenn voru komnir á slysstað hálftíma síðar og fyrsti björgunarbíll kom á slysstað tíu mínútum á eftir björgunarmönnum. Búið var um hinn slasaða og hann fluttur til byggða þar sem sjúkrabíll beið hans og flutti til Akureyrar.

Féll niður vök

Þyrla Landhelgisgæslunnar sótti um hálf fimm leytið mann sem fallið hafði niður vök á Lyngdalsheiði. Ferðafélagar mannsins náðu manninum upp úr vökinni og fluttu hann að Gjábakkaveg til móts við björgunarlið. Maðurinn var kaldur og þrekaður og var hann fluttur á slysadeild Landspítala-Háskólasjúkrahús.

Fá ekki störf sem hæfa menntun

Margir flóttamenn sem sest hafa að á Íslandi kvarta undan því að fá ekki störf er hæfir menntun þeirra og fyrri störfum. Stór hluti þeirra vinnur við ófaglærð störf.

Landsnet kaupir flutningsvirki af Hitaveitu Suðurnesja

Landsnet hefur keypt 132 kV háspennulínu af Hitaveitu Suðurnesja sem liggur frá aðveitustöð Landsnets við Hamranes, sunnan Hafnarfjarðar, að aðveitustöð Hitaveitu Suðurnesja við Öldugötu í Hafnarfirði.

Fer yfir í Sjálfstæðisflokkinn

Oktavía Jóhannesdóttir bæjarfulltrúi og oddviti Samfylkingarinnar á Akureyri tilkynnti í dag að hún hefði sagt skilið við flokkinn og hygðist þess í stað ganga í raðir Sjálfstæðismanna. Hún segir ákvörðunina tekna að vel yfirlöguðu ráði og byggi á því mati hennar að Samfylkingin verði seint sá frjálslyndi og framsækni jafnaðarmannaflokkur sem hún og aðrir kratar reiknuðu með í upphafi.

Tvær konur hlutu heiðursverðlaun Vísindafélags Íslendinga

Vísindafélag Íslendinga afhenti verðlaun úr Ásusjóði. (LUM) Ásusjóður er kenndur við Ásu Guðmundsdóttur Wright sem afhenti Vísindafélaginu peningagjöf á hálfrar aldar afmæli félagsins nítján hundruð sextíu og átta. Verðlaunin í ár runnu til tveggja kvenna fyrir margþættar rannsóknir á krabbameini, orsökum þess og erfðum. Það voru doktor Jórunn Eyfjörð erfðafræðingur og doktor Helga Ögmundsdóttir læknir. Þær hafa haft samstarf í leit að brjóstakrabbameinsgenum og gert viðamikla rannsókn á stökkbreytingum í þessum genum meðal Íslendinga.

Landvinnsla ekki á leið frá Akureyri

Landsvinnsla Brims fær nafnið ÚA á nýjan leik og verður eitt af fjórum afkomusviðum innnan Brims. Þetta kom fram á starfsmannafundi fyrirtækisins á Akureyri í dag.

Dregur úr væntingum Breta

Það dró úr væntingum breskra neytenda í desember og hafa þær ekki mælst lægri síðan í mars 2003. Neytendur virðast þannig vera svartsýnni á horfur í efnahagsmálum en áður og ólíklegra er að þeir standi í stórkaupum á næstu misserum.

Jón formaður nefndar sem skoðar málefni Kjaradóms

Forsætisráðherra hefur skipað Jón Sigurðsson, fyrrverandi Seðlabankastjóra og ráðherra, formann nefndar til að fara yfir málefni Kjaradóms, eftir að dómurinn ákvað að breyta ekki úrskurði sínum um kjör æðstu embættismanna. Stjórnarandstaðan ætlar ekki að skipa fulltrúa í nefndina nema þing verði kallað saman fyrir áramót.

Umhverfisráðherra staðfestir breytingar á svæðisskipulagi

Sigríður Anna Þórðardóttir umhverfisráðherra hefur staðfest breytingu á svæðisskipulagi miðhálendis Íslands 2015 sem samvinnunefnd miðhálendis samþykkti á fundi sínum þann 12. ágúst 2005. Breytingarnar varða m.a. jarðvarmavirkjun við Hágöngur og lagningu háspennulínu frá þeirri virkjun og breytingu skálasvæðis við Kerlingarfjöll í hálendismiðstöð vegna ferðaþjónustu. Umhverfisráðherra hefur hins vegar synjað staðfestingu á þeim hluta svæðisskipulagstillögunnar sem lýtur að Norðlingaölduveitu.

Viðskiptahalli við útlönd aldrei meiri

Viðskiptahalli við útlönd hefur aldrei verið meiri en það sem af er ári nemur hallinn tæpum níutíu milljörðum króna. Stórfelldur innflutningur á bílum vegur þungt en um átján þúsund nýir bílar hafa verið skráðir það sem af er ári.

Eldur í ruslageymslu fjölbýlishúss

Slökkvilið höfuðborgarsvæðisins var kallað að fjölbýlishúsi við Engjasel í Breiðholti á þriðja tímanum í dag vegna elds í ruslageymslu hússins. Einn slökkviliðsbíll var sendur á vettvang ásamt sjúkrabíl en það tók aðeins fjórar mínútur að slökkva eldinn.

Almenningur getur ekki skipt um raforkusala fyrr en í vor

Rafmagn á Íslandi verður selt á samkeppnismarkaði frá og með 1. janúar næstkomandi. Þó lítur út fyrir að almenningur geti ekki skipt um raforkusala fyrr en í fyrsta lagi í vor, ef þeir hyggjast gera það á annað borð, vegna tafa á aðlögun erlends viðskiptahugbúnaðar að íslenskum aðstæðum.

Fékk styrk úr minningarsjóði

Guðrún Jónsdóttir, talskona Stígamóta, fékk 250 þúsund króna styrk úr minningarsjóði Gunnars Thoroddsens, fyrrverandi borgarstjóra og forsætisráðherra. Styrkinn afhenti Steinunn Valdís Óskarsdóttir borgarstjóri Guðrúnu við athöfn í Höfða.

Allir leikskólakennarar Sólbrekku segja upp

Allir leikskólakennarar á leikskólanum Sólbrekku á Seltjarnarnesi hafa sagt upp störfum. Nú stendur yfir fundur fulltrúa bæjarins og leikskólakennara og líklegt er talið að mál skýrist eftir því sem líður á daginn.