Kóka kóla verðmætasta vörumerkið

Aðeins tvö norræn fyrirtæki eru á lista yfir hundrað verðmætustu vörumerki heims. Þetta eru Nokia og IKEA. Tímaritið Business Week birti listann, en á honum trónir Coca Cola í efsta sæti. Nokia er í áttunda sæti, fellur úr sjötta sæti í fyrra. IKEA er í fertugasta sæti, hækkar sig úr fertugasta og þriðja sæti í fyrra.

Landshnitakerfið endurmælt

Rekið á Ameríku- og Evrópuflekunum auk jarðskorpuhreyfinga eins og á Suður- og Norðausturlandi knýja á að landshnitakerfið verði endurmælt. Landmælingar Íslands ráðast í verkið á fyrri hluta þessa mánaðar.

Skotmaður tekinn með hassplöntur

Lögreglan í Reykjavík handtók í morgun manninn sem skaut með haglabyssu á tvö hús að Reykhólum í Barðastrandasýslu. Maðurinn var handtekinn í austurhluta Reykjavíkur í húsnæði sem tilheyrir honum.

Tvísýnt með flug til Eyja

Tvísýnt er með flug til og frá Vestmannaeyjum í dag. Sem stendur er opið fyrir flug en það lá niðri um tvöleytið. Milli tvö og þrjú hundruð manns eru staddir á flugvelli Vestmannaeyja að sögn lögreglu en allir eru rólegir ennþá. Lögregla segir að bruðgðið geti til beggja átta með flug í dag.

Þurfa nýjan þjóðsöng

Serbía og Montenegro, einu ríki fyrrum Júgóslavíu sem enn eru í ríkjasambandi, reka nú á eftir því að samþykkt verði nýr þjóðsöngur ríkjanna til að forðast hróp og niðurköll á Ólympíuleikunum, en það þykir mjög líklegt ef spilaður verði gamli þjóðsöngur Júgóslavíu.

Alþjóðlegt heimskautaár 2007

Alþjóðlegt heimskautaár hefst árið 2007. Þá munu vísindamenn hefja nýjar boranir í Grænlandsjökli í þeim tilgangi að öðlast meiri þekkingu um fortíðina. Þetta kemur fram í frétt frá NRK í Noregi.

Alvarlegt slys við Kotströnd

Alvarlegt bílslys varð við Kotströnd á Suðurlandsvegi síðdegis, þegar fólksbíll í framúrakstri lenti framan á jeppa. Kona sem ók fólksbílnum og karlmaður sem var farþegi í bílnum voru flutt alvarlega slösuð með þyrlu Landhelgisgæslunnar á slysadeild í Reykjavík. Suðurlandsvegur var lokaður á tíma en hefur nú verið opnaður aftur fyrir umferð.

Sjö mótorcrosshjólum stolið

Sjö torfæruhjólum var stolið úr læstri geymslu í Ártúnsholtinu núna um helgina og búnaði sem notaður er við akstur þeirra í torfærum. Eitt hjólanna fannst í undirgöngum í Mjódd óskemmt og læst við staur eins og ætti að sækja það síðar.

Viðbúnaður Bandaríkjanna aukinn

Óupplýst handtaka á 25 ára tölvunarfræðingi þann 13. júlí leiddi til þess að viðbúnaðarstig bandarískra stjórnvalda var hækkað á sunnudag.

Sláturúrgangur í gróðurmold

Sláturúrgangur úr stórgripum er tættur niður og verður að eðalgróðurmold norður á Akureyri. Fleiri þúsund tonn af slíkum úrgangi falla til á ári hverju en mest af því er grafið í jörð. Stærstur hluti þess úrgangs sem fellur til í sláturhúsum er einfaldlega urðaður.

Kostnaður við leit mikill

Kostnaður við leit að hópi ferðamanna sem sendu neyðarkall af hálendinu í vikunni nemur mörgum milljónum. Enn hefur ekkert spurst til hópsins. Enginn sem tengist málinu hefur gefið sig fram, svo enn er verið að grennslast fyrir um fólkið, en talsmaður þeirra sagði í neyðarkalli síðastliðinn fimmtudag að tuttugu manns væru veikir af matareitrun.

Mikil flóð í Pennsylvaníu

Úrhellis rigningar og flóð ollu miklum usla í Pennsylvaníu í Bandaríkjunum í gær. Flóðin voru slík að hús fóru á bólakaf og bílar sópuðust eftir götum. Þetta olli miklum samgöngutruflunum, bæði á landi og í lofti.

Óvíst um áhrif á verð hér

Ísland er í flokki ríkja sem búa við erfið framleiðsluskilyrði í landbúnaði. Verður þeim veitt svigrúm vegna tollalækkana sem Alþjóðaviðskiptastofnunin hefur lokið rammasamkomulagi um. Ekki er enn ljóst hver áhrifin verða á verð á varningi hér á landi. Samningurinn verður útfærður á næstu þrem til fjórum árum. </font /></font /></b /></b />

Forseti í þriðja sinn

Innsetningarathöfn forseta Íslands fór fram á sunnudag við hátíðlega athöfn í dómkirkju og alþingishúsi í viðurvist fjölda gesta. Í ávarpi sínu þakkaði forsetinn stuðning fólks um landið allt. Dorrit Moussaieff klæddist mesta viðhafnarbúningi íslenskra kvenna, skautbúningnum. </font /></b />

Gríðarlegar öryggisráðstafanir

Gríðarlegar öryggisráðstafanir hafa verið gerðar við fjármálastofnanir í New York, vegna yfirvofandi árásar hryðjuverkamanna. Þegar fjármálastofnanir í New York opnuðu fyrir viðskipti, í morgun, voru þær umkringdar vegatálmum, öryggishliðum og lögregluþjónum með hríðskotariffla og sprengjuleitarhunda.

Lýðræðisandi er leiðarljósið

Ólafur Ragnar Grímsson var settur forseti Íslands í þriðja sinn við hátíðlega athöfn í Dómkirkjunni og á Alþingi á sunnudag. Í innsetningarræðu sinni sagði forsetinn meðal annars: "Þjóðin hefur nú í þriðja sinn falið mér að gegna embætti forseta Íslands og bera ábyrgð og skyldur sem traustinu fylgja." </font /></font /></b />

Fjölmennasta unglingalandsmótið

Fjölmennasta unglingalandsmóti UMFÍ til þessa var slitið í gærkvöld með flugeldasýningu. Talið er að um tíu þúsund manns hafi verið á landsmótinu á Sauðárkróki. Landsmót UMFÍ var haldið á Sauðarkróki fyrir þremur vikum.

Ein með öllu á enda

Lögreglu á Akureyri bárust tilkynningar um nauðgun og líkamsárás í nótt. Þá komu upp óvenju mörg fíkniefnamál eða 46 talsins. Að öðru leyti gekk helgin stórslysalaust fyrir sig á Akureyri, þar sem haldin var fjölskylduhátíðin Ein Með Öllu.

Metfjöldi fíkniefnamála upplýstur

Metfjöldi fíkniefnamála var upplýstur á þjóðhátíð í Vestmannaeyjum. Þrjár líkamsárásir voru kærðar og ein nauðgun tilkynnt neyðarmóttöku. Tungl var fullt í gær og fangageymslur fullar, en þjóðhátíðin þykir samt sem áður hafa farið vel fram.

Póstpokinn lenti í fjörunni

Svo virðist sem líki Sri Ramawati hafi verið varpað af klettum ofan í fjöru áður en flæddi að. Björgunarsveitir settu út rekald í dag, til að líkja eftir reki líksins í sjónum, og lögðu sig í framkróka við að fylgja lýsingum Hákonar Eydals sem hefur viðurkennt að hafa myrt Sri.

170 kannabisplöntur í austurbænum

Hundrað og sjötíu kannabisplöntur fundust í morgun í húsnæði manns í Reykjavík, sem var eftirlýstur fyrir að skjóta úr haglabyssu á tvö hús á Reykhólum í Barðastrandasýslu. Hann var handtekinn ásamt ætluðum vitorðsmanni.

Prestssonur gekk berserksgang

Heimamenn á Reykhólum eru æfir út í Lögregluna á Patreksfirði vegna seinagangs um helgina þegar Benedikt Bragason, sonur prestsins á staðnum, skaut af haglabyssu á nokkur hús í bænum.

Sprenging í miðbæ Prag

Sprenging varð í Prag í dag, í miðju verslunarhverfi í sögufrægum hluta miðbæjarins. Talið er að bíll hafi sprungið og að minnsta kosti 16 séu særðir.en ekki vitað nánar um tildrög sprengingarinnar.

Skaut af haglabyssu á tvö hús

Maður vopnaður haglabyssu skaut á tvö hús á Reykhólum í Barðastrandasýslu í gærmorgun. Sérsveit Ríkislögrelustjóra var kölluð vestur, en maðurinn finnst hvergi. Þórólfur Halldórsson er sýslumaður á Patreksfirði. Hann upplýsti að maður sem talið var að væri í annarlegu ástandi hefði skotið á tvö hús.

Sex látnir í Uzbekistan

Sex eru nú látnir eftir sprengjuárásir á sendiráð Bandaríkjanna og Ísraels og skrifstofur ríkissaksóknara í borginni Tashkent í Uzbekistan á föstudaginn. Talið er að múslimskir öfgamenn standi að baki verknaðinum.

Ísland fær svigrúm í samningum

Stefán Haukur Jóhannesson, formaður samninganefndar innan Alþjóðaviðskiptastofnunarinnar, segir vilja og svigrúm innan stofnunarinnar til að tryggja undanþágur fyrir Ísland og önnur ríki með viðkvæman landbúnað. Hann segir það létti að nú liggi markmið fyrir.

Skin og skúrir í Vestmannaeyjum

Komin sól í Vestmannaeyjum eftir slagviðri í nótt. Aðsóknarmet var sett í Fjölskyldu og húsdýragarðinum í gær og vinsælasta útihátíðin er á Akureyri.

Sextíu ár frá uppreisn í Varsjá

Sextíu ár eru liðin frá því að íbúar Varsjár í Póllandi risu upp gegn ógnarstjórn nasista í Seinni Heimsstyrjöld. 200 þúsund Pólverjar létust í uppreisninni og höfuðborgin var lögð í rúst í átökunum.

Sjö gíslar lausir úr haldi

Sjö gíslar sem hafa verið í haldi mannræningja í Írak í tvær vikur, hefur verið sleppt að sögn utanríkisráðherra Kenya. Talmenn indversku stjórnarinnar segjast þó ekki hafa fengið neina staðfestingu um að gíslarnir hafi verið látnir lausir.

Sæludagar í Vatnaskógi

Hátíðarhöld á Sæludögum í Vatnaskógi ganga vel að sögn mótshaldara. Reiknað er með að um 700-800 gestir hafi komið á svæðið frá föstudegi. Í gærkvöldi sóttu milli 300-400 manns kvöldvöku og svo tónleika þeirra systkina Kristjáns Kristjánssonar (KK) og Ellenar Kristjánsdóttur.

Gíslarnir enn í haldi

Þeir sjö gíslar sem ríkisstjórn Kenýa sagði að hefðu verið sleppt í dag, eru enn í haldi mannræningja í Írak að sögn atvinnuveitenda mannanna en þeir voru bílstjórar fyrir kúweiskt fyrirtæki í Írak.

12 látast í kirkjusprengingum

Talið er að að minnsta kosti 12 hafi látist í nokkrum sprengingum nálægt kirkjum í Bagdad og borginni Mosul í dag að sögn lögreglu í Írak. Fyrstu tvær sprengingarnar urðu nálægt kirkjum í fjölmennu verslunarhverfi í Bagdad.

Ólafur settur inn í embætti

Ólafur Ragnar Grímsson, forseti Íslands, var settur inn í embætti við hátíðlega athöfn í Alþingishúsinu laust eftir klukkan fjögur að lokinni helgistund í dómkirkjunni. Eiginkona forsetans, Dorrit Moussaieff, var íklædd íslenskum skautbúningi sem Jakobína Thorarensen saumaði árið 1938.

13 innbrot tilkynnt í Reykjavík

Lögreglan í Reykjavík hefur fengið tilkynningar um 13 innbrot um helgina. Fimm þeirra áttu sér stað í gærmorgun í Seljahverfi. Þar var litlu stolið en lögregla hefur haft uppi á hinum seka, sem að sögn hennar á við geðræn vandamál að stríða.

Kallar á uppbyggingu þjóðvega

Formaður samgöngunefndar Alþingis segir það mikið áhyggjuefni að Eimskip skuli hætta strandflutningum frá og með 1. desember næstkomandi. Það kalli á hraðari uppbyggingu á þjóðveginum. Skipulagsbreytingar eru fyrirhugaðar hjá Eimskipum til þess að bæta þjónustu félagsins og mæta auknum kröfum

Elsti prentstafur á Íslandi

Er b-ið úr Guðbrandsbiblíu fundið á Hólum í Hjaltadal? Fornleifafræðingar hafa grafið niður á elstu lög prenthúsanna þar sem fyrsta biblían á íslensku var prentuð í tíð Guðbrands biskups Þorlákssonar árið 1584.

20 manns létust í Írak í dag

Hátt í 20 manns létust í sex sprengjuárásum í Bagdad og Mósúl í Írak í dag. Flestar þeirra voru sjálfsmorðsárásir fyrir utan kristnar kirkjur. Í það minnsta tólf létust í einni sprengjunni en uppreisnarmaður lagði bíl sínum fullum af sprengiefni fyrir utan armenska kirkju í miðborg Bagdads í þann mund sem guðþjónusta var að hefjast.

Viðbúnaður í New York

Mikill viðbúnaður er í New York, New Jersey og Washington en stjórnvöld í Bandaríkjunum segjast hafa öruggar heimildir fyrir því að hryðjuverkasamtökin al-Qaeda hyggist gera árás á fjármálastofnanir í borgunum.

Almenn ánægja með hátíðir

Vestmannaeyingar eru ánægðir með sína þjóðhátíð en Akureyringar. Þar voru fangageymslur tómar í morgun. Mikil eftirvænting er í Herjólfsdal eftir brekkusöng Árna Johnsens í kvöld.

Fjölmennasta útihátíðin friðsamleg

Lögreglan á Akureyri er í sjöunda himni yfir hátíðinni "Ein með öllu" sem haldin er í bænum. Ekki hefur verið tilkynnt um líkamsárásir, óspektir, nauðganir eða önnur ofbeldisverk til lögreglunnar um helgina þrátt fyrir að hátt í 15 þúsund gestir séu í bænum. Veðrið hefur leikið við hátíðargesti á Akureyri alla verslunarmannahelgina.

Orður og kjólföt við innsetningu

Er umgjörðin um embættistöku forsetans orðin hégómleg eða ber hún vott um valdabaráttu? Þessu veltu sumir fyrir sér á Austurvelli í dag. Athygli vakti að þegar Vigdís Finnbogadóttir var sett inn í embætti forseta árið 1988 sniðgekk Ólafur Ragnar Grímsson, þáverandi þingmaður, kröfur um klæðaburð.

Sjaldan jafn margir á embættistöku

Sjaldan hafa jafn margir lagt leið sína á Austurvöll til að fylgjast með embættistöku forseta Íslands eins og í dag. Talið er að um 700 manns hafi verið á staðnum.

Þriðji hver fjarverandi

Þriðji hver alþingismaður var fjarverandi þegar forseti Íslands sór embættiseið í dag. Nær allir þingmenn stjórnarandstöðunnar voru viðstaddir en meira en helmingur stjórnarþingmanna sá sér ekki fært að mæta. Einn af hverjum þremur þingmönnum hafði öðrum hnöppum að hneppa þegar forseti Íslands sór embættiseiða í dag

Embættistaka foseta Íslands

Trúin á þjóðina, traust á almenningi, er grundvöllur stjórnskipulags vors sagði Ólafur Ragnar Grímsson þegar hann sór í þriðja sinn embættiseið sem forseti Íslands nú síðdegis og vitnaði í orð forvera síns, Ásgeirs Ásgeirssonar.