Grótta í sam­bandi við Davíð Smára

Þetta herma heimildir Vísis.

Davíð Smári hætti þjálfun Njarðvíkur í vikunni eftir eitt ár í starfi. Njarðvík hafnaði í fimmta sæti Lengjudeildarinnar á nýliðinni leiktíð og Njarðvíkingar töpuðu fyrir Þrótti í umspili um sæti í Bestu deild karla.

Davíð var áður þjálfari Kórdrengja og Vestra en hann stýrði Vestra upp í Bestu deildina og gerði þá að bikarmeisturum áður en honum var sagt upp undir lok tímabilsins í fyrra áður en Vestri féll niður í Lengjudeildina.

Grótta leitar þjálfara eftir að Rúnar Páll Sigmundsson fékk sig lausan frá félaginu til að taka við Stjörnunni í Bestu deildinni. 

Grótta hafnaði í áttunda sæti Lengjudeildarinnar, aðeins tveimur stigum frá falli, en var þó ekki í fallhættu undir lok móts. Liðið endaði deildina sérlega illa og tapaði síðustu fjórum leikjum tímabilsins.

Þónokkur lið í efstu tveimur deildunum leita þjálfara þessi dægrin. Auk Gróttu og Njarðvíkur leitar Völsungur einnig nýs þjálfara fyrir komandi átök í Lengjudeildinni.

Fylkir leitar þjálfara eftir að Heimir Guðjónsson tók við ÍA og Breiðablik er eina þjálfaralausa Bestu deildar félagið eftir brottför Ólafs Inga Skúlasonar.

KA, sem féll í Lengjudeildina, leitar þá eftirmanns Hallgríms Jónassonar og Eiðs Smára Guðjohnsen og KA-menn hafa tekið púlsinn á Srdjan Tufegdzic, fyrrverandi þjálfara liðsins.