Koeman yngri fyrsti mark­vörðurinn til að skora tvennu

Koeman yngri er alnafni og sonur goðsagnarinnar Ronald Koeman sem lék við góðan orðstír með Groningen, Ajax, Barcelona, PSV og Feyenoord á sínum ferli.

Sá eldri var miðvörður en skoraði haug af mörkum, enda meðal sparkvissari leikmanna Evrópu á meðan hann spilaði. Koeman skoraði mörk úr langskotum, aukaspyrnum og af vítapunktinum.

Alls skoraði Koeman eldri 239 mörk á ferlinum, þar af 115 af vítapunktinum, úr 131 vítaspyrnu sem hann tók.

Sonur hans, sem er fæddur í Barcelona árið 1995, virðist hafa erft sparktæknina en hann er orðin vítaskytta liðs síns Telstar í hollensku úrvalsdeildinni.

Koeman yngri fékk þó ekki tækifæri til að sanna sig á vítapunktinum fyrr en í fyrra, þegar Telstar var að spila sitt fyrsta tímabil í efstu deild. Þá skoraði hann eitt mark af vítapunktinum.

Í dag reyndi svo aftur á kappann, og það tvisvar. Og tvisvar skoraði Koeman af vítapunktinum til að tryggja Telstar 2-2 jafntefli.

Telstar er félag Nökkva Þeys Þórissonar en hann gerði liðsfélögum sínum erfitt fyrir er hann fékk rautt spjald eftir aðeins 22 mínútna leik gegn Cambuur á heimavelli.

Gestirnir komust 2-0 yfir í kjölfarið en Koeman skoraði úr víti um miðjan síðari hálfleik og svo aftur á elleftu mínútu uppbótartíma.

Hann er fyrsti markvörðurinn í sögunni til að skora tvö mörk í einum og sama leiknum í hollensku úrvalsdeildinni.