Bein út­sending frá Sunda­höfn: Hvað verður um á­höfn Bandero?

Skipstjóri Bandero var handtekinn seint í gærkvöld eftir að hafa ekki virt tilskipanir Landhelgisgæslunnar. Áhöfn hvalveiðiskipsins Hvals 9 hafði óskað eftir aðstoð Gæslunnar og taldi öryggi sínu ógnað. Forstjóri Landhelgisgæslunnar sagði að áhöfn Bandero hefði reynt að henda netadræsum í skrúfu hvalveiðiskipsins og þannig lagt skipverja í hættu.

Skipstjórinn og áhöfn hans voru enn um borð í Bandero á öðrum tímanum í dag og er talið að alls 21 sé um borð. Símar og myndavélar voru teknar af þeim í gær en Paul Watson, leiðtogi samtakanna sem gera út Bandero, hefur sagt að hann hafi ekki náð sambandi við áhöfnina. 

Beina útsendingu má sjá í spilaranum hér að neðan.

Forstjóri Landhelgisgæslunnar segir að þetta hafi verið gert til að draga úr hættunni á því að skipverjar gætu sett sig í samband við einhvern í landi og spillt rannsókn málsins. 

Óljóst er hve lengi skipverjar verða um borð. Landhelgisgæslan segir að áhöfn hafi veitt mótspyrnu í gær og ekki hægt á skipinu. Því hafi fulltrúar Gæslunnar og sérsveitar ríkislögreglustjóra þurft að fara um borð á meðan skipið var á fullri ferð. Þrátt fyrir þetta hafi aðgerðin gengið vel og skipverjar ekki sýnt mótstöðu eftir að þeir voru komnir um borð. 

Fylgst er með gangi mála í vaktinni að neðan. Þið gætuð þurft að endurhlaða síðunni ef vaktin birtist ekki strax.