Beið spenntur eftir því að Amin færi út

Amin Cosic fór nýverið frá KR til Noregsmeistara Viking í Stafangri og varð með því á meðal dýrari leikmanna í sögu efstu deildar á Íslandi. Kaupverðið er sagt nema um 80 milljónum króna.

Hann hafði leikið einkar vel á vinstri kanti KR-liðsins eftir skipti hans í Vesturbæinn frá Njarðvík um mitt síðasta sumar. Galdur átti stórleik, eins og flestir leikmenn KR, í 5-0 stórsigri á Stjörnunni í gær.

Galdur Guðmundsson kom einnig til KR á miðju síðasta tímabili en meiddist illa síðasta haust. Hann hefur beðið eftir tækifæri sínu með liðinu og ekki er hægt að segja annað en að hann hafi gripið það. Hann hefur verið öflugur í undanförnum leikjum með KR, eftir brottför Amin til Noregs.

„Ég er virkilega sáttur. Við erum á leið í smá frí frá deildinni og það er mikilvægt að klára svona góðan sigur fyrir fríið,“ sagði Galdur eftir leik í gær. Hann hefur beðið þess með eftirvæntingu að komast í lið KR.

„Mér hefur liðið virkilega vel. Ég vissi að ég væri klár og mér finnst ég vera að sýna hversu góður ég er. Loksins þegar ég er farinn að spila. Ég hef verið klár lengi en ég á enn langt í land, en er ánægður,“

„Ég meiddist illa undir lok síðasta tímabils og var eiginlega allt undirbúningstímabilið að ná mér í stand. Þetta er ekki komið enn 100 prósent en síðustu vikur er ég búinn að vera heill. Ég er virkilega ánægður að vera farinn að spila. Það eru lífsgæði í því,“

Tóku þessi meiðsli á?

„Já, klárlega. Það er svekkjandi að koma heim og meiðast strax. Það tók alveg á. En ég veit hvað í mér býr svo ég er að fara að sýna það áfram,“ segir Galdur.

Amin hafði eignað sér þessa stöðu á vinstri kantinum og var öflugur. Taldir þú niður dagana eftir að hann færi út?

„Ég veit það ekki,“ segir Galdur og hlær. „Amin er náttúrulega þvílíkur gæji. Hann á allt þetta skilið eftir það sem hann hefur lagt inn. En ég viðurkenni það alveg heiðarlega að ég var orðinn spenntur að hann færi út. Svona er þetta bara. Svona er fótboltinn.“